Nova mazlaria a Trun è prest averta

La fin zercladur 2015 è stà l’emprima badigliada per la nova mazlaria da Ivo Nay a Trun. Ils emprims animals duain vegnir mazzads ils 19 da schaner.

Laschar ir video «Ivo Nay avra ina nova mazlaria a Trun»

Ivo Nay avra ina nova mazlaria a Trun

2:19 min, Telesguard dals 7.1.2016

Avant 3 onns ha Ivo Nay da Trun giu l'idea da bajegiar ina nova mazlaria a Trun. La mazlaria sa chatta en in bajetg da 7 m autezza ed ina surfatscha da bunamain 600 m2. Mez schaner duai quella vegnir prendida en funcziun per l’emprima giada. Enfin 750 envernantas duain vegnir mazzadas per onn da 4 mazlers. Per gronda part sajan quai animals indigens, per incumbensa da purs ni da mazlers da la regiun.

Charn d’auta qualitad per la bassa

La mazlaria dispona da 2 grondas frestgeras che han plaz per madirar la charn da 80 animals per 3-4 emnas. La qualitad da la charn indigena saja gia buna. Cun laschar madirar ella daventia ella anc pli savurusa e delicata, sco Ivo Nay quinta.

Perquai spera el era da savair vender quella charn betg mo als hotels e restaurants da la regiun, mabain era en la bassa, p.ex. a Turitg. I dettia gia contacts cun differents interessents.

RR Actualitad bunura 06:00

Di da las portas avertas

Sonda ils 9 da schaner ha la mazlaria a Trun / Clius di da las portas avertas. Davent da las 10:00 enfin las 15:00 san ins visitar la mazlaria.