Siglir tar il cuntegn
cuntegn

Surselva Nova chasa da cultura per la Val Lumnezia

Suenter ina renovaziun moderada è l'anteriura chasa communala a Lumbrein puspè averta. La Casa d'Angel, uschia il nov num da la chasa, duai daventar ina chasa da cultura per l'entira Val Lumnezia.

La Casa d'Angel a Lumbrein.
Legenda: La Casa d'Angel a Lumbrein. RTR, C.Albin
Ina part da la exposiziun en la Casa d'Angel.
Legenda: Ina part da la exposiziun en la Casa d'Angel. RTR, C. Albin

L'exposiziun d’avertura, curada da Nicole Seeberger, è part da la seria «Gastspiele» dal museum d'art grischun. Ella ha il titel «Val Lumnezia - aspects». Exponidas èn pliras fotografias e maletgs da la Val Lumnezia. Igl intent è da mussar differents aspects dal svilup da la val Lumnezia.

Chasa da cultura vitala e moderna

La administratura da la Casa d'Angel, Anne-Louise Joël, è fitg cuntenta cun l'emprima exposiziun en «sia» chasa. Avir maletg en lightbox.

Anne-Louise Joël, l'administratura da la Casa d'Angel.
Legenda: Anne-Louise Joël, l'administratura da la Casa d'Angel. RTR, C. Albin

Ella na vul numnadamain betg mo mussar bels maletgs. Cun las exposiziuns vul ella era dar impuls als visitaders. Anne-Louise Joël vul crear ina chasa da cultura regiunala che tematisescha era temas actuals. Uschia vegnan las proximas exposiziuns planisadas cun l'idea d'involver ils indigens ed d'infurmar els sur da l’atgna istorgia e cultura.

Cristal dal Piz Regina

Il cristal gigantic dal Piz Regina, exponì en il tschaler da la Casa d'Angel.
Legenda: Il cristal gigantic dal Piz Regina, exponì en il tschaler da la Casa d'Angel. RTR, C. Albin

Ina attracziun tut speziala sa chatta en il tschaler da la Casa d’Angel. Là è exponì in dals dus cristals giganticas dal Piz Regina. Il cristal da quarz da fim paisa bunamain 1'000 kg e vala sco in dals pli gronds cristals dal mund.

La vernissascha da l'emprima exposiziun en la Casa d'Angel ha lieu sonda, ils 11 da zercladur 2015 a las 17:00.