Siglir tar il cuntegn
Inhalt

Surselva Nova applicaziun per promover il beachvolley

L'associaziun naziunala da ballarait Swiss volley ha in problem. Mo ina pitschna part da las rodund 50’000 persunas che dattan beachvolley en Svizra èn commembras da l’associaziun. Cun ina nova app per telefonins vul l'associaziun chattar novas commembras e novs commembers.

Balla da volley alva ed il text “Open Beach Volley League” alv sin in funs mellen.
Legenda: Il logo da la nova app. MAD

La nova app gratuita cul num "Open Beach Volley League" è in simpel program per chattar auters giugaders da beachvolley ord la regiun e per nudar ils resultats dals gieus. Suenter la registraziun, po mintga persuna tschertgar auters giugaders cun inditgar il lieu ed il temp, cura ch’el dess gugent in gieu da beachvolley. Cun simplamain smatgar in buttun, pon auters giugaders lura acceptar la dumonda. Suenter il gieu sa il resultat vegnir registrà directamain en l’app. Ils victurs survegnan 3 puncts, ils perdents 1 punct. Sin basa da quels puncts vegn lura creà ina rangaziun cun tut ils giugaders.

Finamira è dapli commembers

Las persunas che sa registreschan daventan automaticamain commembers da Swiss Volley. Tenor Roman Cantieni da Glion, el è commember da la suprastanza da Swiss Volley ed in dals iniziants da la nova app, è la finamira da Swiss Volley, da survegnir 1’000 novs commembers enfin la fin settember. Dapli commembers munta numnadamain dapli daners per Swiss Volley. Sco mintga associaziun da sport naziunala, survegn Swiss Volley mintg’onn daners da Swiss Olympic per promover il sport da ballarait. La summa repartida dependa dal dumber da commembers.

Dapli entradas cun reclama

Sper il sustegn da Swiss Olympic, spera Roman Cantieni era pudair recaltgar daners cun vender spazi da reclama entaifer l’app. El è persvas, che l’app saja fitg interessanta per far reclama. La raschun è, che l’app vegn era lantschada en Germania, grazia ad ina cooperaziun cun l’associaziun da ballarait tudestga. En Germania giogan rodund 6 milliuns persunas ballarait, pia 6 milliuns potenzials clients per fatschentas interessadas da far reclama.

L'app gratuita po vegnir telechargiada en l'app store da Apple e tar Google play.