Siglir tar il cuntegn

Header

Roda da vent da sutensi.
Legenda: Ina roda da vent custa var 3 milliuns francs. RTR, Linus Livers
cuntegn

Surselva Nov vent, nov project, cun nova societad parc da vent Lumnezia

Il project per in parc da rodas da vent en Lumnezia prenda nov chatsch cun dimensiuns pli pitschnas. Il nov project prevesa 17 rodas da vent da la fermezza da 3 kWh.

Las rodas da vent èn tar il nov project tschentadas en la regiun Umsu-Scharls, e cun quai èn tuttas sin il territori da la vischnanca Lumnezia. Cun quest nov project quintan ils iniziants enturn Wolfgang Zelzer cun pli gronda acceptanza tar la populaziun. Era il fatg ch'i èn planisads ussa 17 enstagl da 40 rodas da vent pudess procurar per dapli acceptanza, ha il president da vischnanca da la Lumnezia Duri Blumenthal manegià.

Vias curtas per dapli acceptanza

L’energia producida cun questas 17 rodas da vent duess vegnir manada a Lumbrein e davent da là furnida en la rait. Las ovras electricas da Lumbrein han gia signalisà interess per ina participaziun, scrivan ils iniziants. L'examinaziun ecologica per quest project saja instradada, hai plinavant num dals iniziants.

Novas vias

La construcziun ed il manaschi dal parc da vent duai restar en ils mauns da la Parc da vent Lumnezia SA, quai è la nova strategia dals iniziants enturn Wolfgang Zelzer.

 Roda da vent sin ina pastgira el Giura.
Legenda: Il parc da vent en il Giura (maletg) fiss pli pitschen che quel da la Lumnezia. RTR, Linus Livers

Las experientschas fatgas cun ils gronds producents d'energia sco EWZ hajan mussà ch'els stoppian tschertgar autras vias. Las datas gia rimnadas dapi l'onn 2010 en quella regiun simplifitgeschian l'examinaziun ecologica. Perquai quintan ils iniziants che la dumonda da bajegiar pudess vegnir gia l'onn 2018.

Da la nova societad Parc da vent Lumnezia SA fan part Wolfgang Zelzer sco manader da fatschenta e Guido Schönenberger sco commember dal cussegl d'administraziun. Betg part fan ils commembers da la Altaventa Surselva SA Andy Imfeld, Marco Tamburlini e Jan Hermann Teut. Quai mussan las indicaziuns da l'uffizi dal register da commerzi grischun.