Il zercladur 2015 ha la populaziun da Falera acceptà la nova planisaziun da zonas e tramess quella a Cuera per laschar approvar ella dal chantun. La resposta dal chantun è stada per gronda part positiva, i ha dentant era da midadas, che la regenza n’ha betg acceptà.
Via libra per nov hotel
Il nov hotel cun chombras ed abitaziuns administradas duai vegnir bajegià sin l‘areal dal grond parcadi a l'entrada da Falera. Quai project exista gia dapi 9 onns e cun la decisiun positiva dal chantun sa el uss vegnir elavurà en detagl. Il chantun ha dentant mo acceptà la midada sut la cundiziun, che l’emprima badigliada vegnia dada anc avant la fin da l’onn 2021.
Nagin engrondiment da la zona da bajegiar per indigens
Betg acceptada è l’engrondiment d’ina zona da bajegiar per indigens agl ur da Falera. Tenor il president communal Wendelin Casutt era previs, da cumpensar quellas novas parcellas cun dezonar autras parcellas en zonas per indigens el center dal vitg.
Cumparegliaziun dals maletgs
En sia resposta attesta la regenza, che la cumpensaziun fiss stada suffizienta, i dettia dentant anc bler potenzial per zonas d’indigens el center da Falera e quai potenzial stoppia l’emprim vegnir explotà. In engrondiment d’ina zona agl ur da Falera n’ha il chantun betg acceptà.
