Siglir tar il cuntegn
Inhalt

Surselva Nov lavuratori forestal communabel per Trin e Flem

La stad 2016 han las vischnancas da Trin e Flem decidì da metter ensemen ils lavuratoris forestals. In nov lavuratori per 4 milliuns francs duai vegnir construì a Trin-Porclis.

Avant 3 onns aveva la vischnanca da Flem preschentà l'idea da metter ensemen las duas partiziuns forestalas. Tenor il president communal da Trin, Stefan Cahenzli, è la suprastanza da Trin spert stada persuenter, dentant mo sut la cundiziun ch’il nov lavuratori vegnia realisà sin il territori da Trin.

Quai duai capitar cun bajegiar in nov lavuratori a Trin-Porclis, en il lieu dal actual lavuratori communal da Trin. Planisà è in cumplex cun bajetgs e biros per il lavuratori forestal communabel da Flem e Trin, cun localitads separadas per il lavuratori communal da Trin che na vegn betg fusiunà cun il lavuratori communal da Flem. Previs è era in nov center da recicladi per la vischnanca da Trin.

Finanzià da Trin e dal chantun

Ils custs per quai nov lavuratori muntan a circa 4 milliuns francs. Il chantun sustegness quai project cun 1,9 milliuns francs, Trin avess pia anc da pajar 2,1 milliuns francs. Flem na sa participescha betg als custs da construcziun, uschia ch'il cumplex resta en possess da la vischnanca da Trin. Il nov manaschi forestal (purtà da las duas vischnancas da Flem e Trin) pajass in tschains da locaziun anc betg definì a la vischnanca Trin.

RR actualitad 11:00