Dapi l’onn 2000 sa chattan ils biros da Bergwaldprojekt a Trin en la chasa Mesaglina. En il medem bajetg deva i anc in lavuratori ed ina garascha. Quella infrastructura na tanscheva dentant betg pli ed uschia ha la fundaziun decidì da renovar ed engrondir l’infrastructura.
Nov vegnan anc realisads ulteriurs magasins, ina gronda sala cun cuschina e chombras da durmir cun total circa 50 letgs. Quella infrastructura supplementara vegn duvrada da las gruppas da voluntaris che prendan part a camps da lavur da Bergwaldprojekt en la regiun da Trin.
Mo lain indigen
La renovaziun da la chasa Mesaglina vegn fatga mo cun duvrar lain indigen, derschì en il guaud da Trin. Quai saja stà ina decisiun sapientiva da la fundaziun, di il manader da fatschenta Martin Kreiliger. Cler fetschia quai il project pli chars, l’incumbensa da la fundaziun saja dentant da proteger il guaud da muntogna. Proteger veglia dentant era dir tgirar e nizzegiar il guaud, pia era duvrar il lain per bajegiar.
4,1 milliuns francs
Ils custs totals per il nov center da guaud da muntogna muntan a 4,1 milliuns francs. La mesadad da quella summa èn agens meds da la fundaziun. Il rest vegn finanzià da la confederaziun cun in emprest senza tschains da 1 milliuns francs, cun daners da sponsurs da quai project e cun ina ipoteca. Per generar entradas supplementaras duain las chombras vegnir affittadas a turists durant il temps che i na dat betg camps da lavur a Trin.