Siglir tar il cuntegn

Header

Navigaziun

Senda da viandar che maina sur ina punt da lain ed atras chaglias sper il Rain en la Ruinaulta.
Legenda: Senda da viandar atras la Ruinaulta. RTR, L. Livers
cuntegn

Surselva Nagina senda da viandar che traversa l’entira Ruinaulta

Ils plans per fabritgar in tunnel da viandar tras la Ruinaulta na pon per entant betg vegnir realisads. Il WWF, la Pro Natura e la Fundaziun per la protecziun da la cuntrada èn cunter tals plans, sco ellas han communitgà.

Primo dettia gia vias da viandar tras la Ruinaulta e secundo donnegian ils plans la natira, argumenteschan las uniuns da l'ambient. L'uniun Ruinaulta aveva annunzià da vulair construir in tunnel da radund 400 meters lunghezza lung il Rain sin l’autezza dal grip da Ransun per colliar era l'ultim toc sco via da viandar.

Las uniuns per l’ambient fan valair, ch’i dat gia ina via atras la Ruinaulta. Quella maina sur il trutg existent da «Val Davos» ensi, sur il grip da Ransun ora.

Senda cun tunnel pussaivla, sche...

Sch’i na fiss betg pussibel da manar la senda sur il grip, èn las uniuns per l’ambient prontas da discurrer dad ina alternativa. Suenter il tunnel, stuess la senda vegnir planisada tranter la viafier e la vart da la muntogna. Uschia pudess l’access direct dals viandants a l’ogna protegida vegnir impedì. La planisaziun da la senda n’exista dentant anc betg.

Resistenza er cunter punt da colliaziun

In ulteriur obstachel per la senda da viandar atras la Ruinaulta è la punt da colliaziun tranter Schluein e Castrisch sur il Rain curt avant Glion.

Fotografia dal Rain en la Ruinaulta davos chaglias.
Legenda: Ina chavorgia tipica en la Ruinaulta. RTR, L. Livers

L'uniun Ruinaulta ha planisà là ina nova punt ensemen cun la serenera Foppa, che posseda la punt existenta. I dess ina nova punt pli gronda per peduns e velocipedists. È encunter quai project han il WWF Grischun e la Pro Natura Grischun annunzià opposiziun. Sulet avantatg en la discussiun per ina nova punt è: las organisaziuns d'ambient èn dal maini, che la punt existenta sto davent. Co la nova punt vesa ora e nua ch'ella stat exact n’è dentant anc betg cler. Enfin che la senda da viandar atras l'entira Ruinaulta daventa realitad, savessi pia anc cuzzar in mument.

RR novitads 18:00