Siglir tar il cuntegn
cuntegn

Surselva Nagina critica pervia da demissiuns tar la Spitex Cadi

Il tema che trais collavuraturas da la Spitex Cadi han visà la plazza n’ha betg chaschunà discussiuns a la radunanza generala. Mo ina persuna ha vulì savair pertge. Sco il president Adelrich Berther ha ditg al Radio Rumantsch hajan questas collavuraturas visà la plazza sin agen giavisch.

Radunanza da l'Uniun da la Spitex Cadi en l'hotel Kistenpass a Breil.
Legenda: Radunanza da l'Uniun da la Spitex Cadi en l'hotel Kistenpass a Breil. RTR, H. Giger

I saja ina casualitad ch’i sa tracta da trais dunnas da Trun. Mo i saja normal che quai dettia ina tscherta fluctuaziun. Impurtant saja, di Adelrich Berther, ch’i na haja betg dà reclamaziuns da clients. Ed impurtant saja era ch’il servetsch per ils clients saja garantì. La Spitex Cadi n'ha betg mancanza da persunal, els hajan avunda persunal qualifitgà.

Spitex Cadi noda gudogn dad 80’000 francs

La Spitex Cadi ha gì in bun onn 2014. Il quint serra cun in gudogn da 80'000 francs. L’uniun da la Spitex Cadi dispona uss d’ina facultad (agen chapital) da mez milliun francs. Quai è vegnì ditg ier saira a la radunanza generala.

La suprastanza da l'Uniun da Spitex Cadi cun il president Adelrich Berther (senester), Sonja Deflorin ed il nov-elegì René Epp.
Legenda: Il president Adelrich Berther (senester), Sonja Deflorin ed il nov-elegì René Epp. RTR/ H. Giger

Plinavant è il deputà dal Cussegl grond René Epp da Sedrun vegnì elegì en suprastanza. El remplazza il vicepresident Beat Candinas (Surrein). Il president Adelrich Berther (Danis) e Sonja Deflorin (Mustér) èn vegnids reelegids.
Plinavant han ils preschents udì in referat da Mathias Bundi cun il tema Sana Surselva.