Siglir tar il cuntegn

Header

Navigaziun

Il vitg da Mustér.
Legenda: Il vitg da Mustér. RTR, Linus Livers
cuntegn

Surselva Mustér: segund scrutini per cussegl da vischnanca

In dals candidats uffizials elegì cun 296 vuschs n’ha betg acceptà l’elecziun perquai ch’el è parentà en lingia directs cun in auter candidat elegì. Il proxim candidat elegì ha dentant mo fatg 12 vuschs, perquai duai dar in segund scrutini.

Mustér ha elegì la fin d'emna passada il cussegl da vischnanca che cumpiglia 15 persunas. Sper 8 cussegliers veders hai dà 7 novs candidats ch'èn era tuts vegni elegids. Dus da quels novs cussegliers, Paul Duff e Christian Loretz, èn dentant parentai en directa lingia e na dastgan perquai tenor lescha betg seser en il medem mument en il cussegl da vischnanca. Uschia ha Paul Duff refusà sia elecziun en favur da Christian Loretz.

Tgi daventa successur?

Atgnamain è la lescha da Mustér clera. Per l'elecziun dal cussegl da vischnanca vala il pli relativ. Sch'ina persuna elegida refusescha l'elecziun, ruschna quai candidat suenter che ha fatg il proxim bler vuschs.

A Mustér è Paul Duff vegnì elegì cun 296 vuschs en 15avla posiziun, l'ultim plaz dals candidats uffizials pia. Sin plazza 16 è l’emprim dals ulteriurs candidats, ch'ha dentant mo fatg 12 vuschs. 12 vuschs da passa 700 cedels da votar valaivels. La vischnanca ha prendì si contact cun quella persuna e dumandà ella, sch'ella accepti l'elecziun. Ella ha però era refusà e la proxima persuna en lingia ha fatg sut 10 vuschs.

Il president communal da Mustér Francestg Cajacob.
Legenda: Il president communal da Mustér Francestg Cajacob. RTR, Linus Livers

Elecziun betg represchentativa

Tenor il president communal Francestg Cajacob è ina persuna cun in tal resultat betg propi qualifitgada per il cussegl da vischnanca. Ella represchenti ina memia pitschna part da la populaziun.

Per quai motiv ha el proponì da far in segund scrutini per remplazzar Paul Duff era sche la lescha pretendess atgnamain da prender si contact cun tut las 136 ulteriuras persunas che han survegnì vuschs a l’elecziun dal cussegl da vischnanca. Il segund scrutini duai avair lieu ils 27 da november 2016 ensemen cun las votaziuns federalas e chantunalas.

RR actualitad 17:00