Siglir tar il cuntegn

Header

Navigaziun

La pendiculara blaua da Mustér.
Legenda: La pendiculara da Mustér a Caischavedra è questa stad gratuita per ils giasts da vacanzas da Mustér e Sedrun. mad
cuntegn

Surselva Mustér Sedrun Turissem - Critica pervi da carta d'osps

Avant intgins dis ha Mustér Sedrun Turissem communitgà ch'ils giasts da vacanzas possian far diever gratuitamain da la Viafier Matterhorn Gottard durant la stad. La purschida cumpiglià il viadi davent da Mustér fin sin il pass da l’Alpsu e da la pendiculara da Mustér a Caischavedra.

Quellas purschidas vegnan pajadas cun il surpli d’entradas che sa resulta cun introducir la nova lescha da turissem l’entschatta da l’onn.

Sper la viafier Matterhorn Gottard e las Pendicularas Mustér han era anc il Center da sport e cultura da Mustér, il Bogn Sedrun e l’Arena da Skis Andermatt Sedrun inoltrà offertas. Quellas n’èn dentant betg vegnidas resguardadas e sco il directur da l’Arena da Skis Andermatt Sedrun, Silvio Schmid di, na saja era betg vegnì discutà u declerà pertge che las offertas n’èn betg vegnidas resguardadas.

Calculà fitg precaut

Sco il president da Mustér Sedrun Turissem, Curdin Brugger di, avessan els gugent era resguardà questas offertas ed includì questas purschidas en la carta d’osps. Il problem saja dentant ch’ins n’enconuschi betg la summa che vegn incassada cun la nova taxa turistica per quest intent. Uschia vegnia quai calculà fitg precaut.

Nus na pudain betg dar ora daners che nus n’avain betg.
Autur: Curdin Bruggerpresident Mustér Sedrun Turissem

La raschun che Mustér Sedrun Turissem è sa decidì per la viafier e la pendiculara da Mustér a Caischavedra è tenor Curdin Brugger fitg clera, cun il tren hajan ins la pussaivladad da sa muventar aifer la regiun da turissem e la pendiculara a Mustér haja ina gronda capacitad da transport glieud e mainia sco la viafier medemamain en buns lieus per far spassegiadas u turas.