Siglir tar il cuntegn

Header

cuntegn

Surselva Mustér: Robert Cajacob candidescha per il presidi communal

Ina gruppa preparatorica per las elecziuns è vegnida incumbensada da tschertgar candidats per ils posts communals a Mustér che vegnan libers cun la fin da l’onn. Actualmain manca anc in candidat per avair avunda candidats per la suprastanza.

audio
Mezdi: Anteriurs politichers s’engaschan anc ina giada a Mustér
ord Actualitad dals 22.07.2016.
laschar ir. Durada: 2 minutas 20 Secundas.

Robert Cajacob è sa declerà pront da candidar per il presidi da vischnanca. El è gia stà durant 7 onns commember dal cussegl da vischnanca, 9 onns en il cussegl da scola e 16 onns en la cumissiun da bajegiar. Atgnamain aveva el quintà avant var trais onns da betg pli surpigliar posts politics: «Dentant sch’ins vegn dumandà, e vesa che betg blers stattan en retscha per surpigliar quest post, èn ins gugent pront da sa gidar. Ed uschia sun jau ma decidì da candidar», di Robert Cajacob.

Actualmain maina el la chasa da tgira S. Martin a Trun. La fin da matg quintava el dad ir en pensiun anticipadamain. Tar in’elecziun terminass Robert Cajacob sia plazza sco manader da la chasa da tgira gia la fin mars.

Novs candidats per la suprastanza

Victor Flepp
Legenda: Victor Flepp RTR

Per la suprastanza stattan Clemens Berther e Victor Flepp a disposiziun. Omadus èn stads en il cussegl da vischnanca. Victor Flepp è stà 22 onns en il cussegl da vischnanca e 4 onns en la cumissiun da gestiun.

Clemens Berther
Legenda: Clemens Berther RTR

Clemens Berther è stà 16 onns en il cussegl da vischnanca e 10 onns en la cumissiun da gestiun. Sco quai che la gruppa preparatorica per las elecziuns communalas communitgescha, hajan ins chattà candidats valabels che hajan experientscha politica e da manar.

Ils novs candidats ston anc vegnir nominads uffizialmain entras il vischinadi u ina gruppa da votants. Enfin ils 26 d’avust pon ulteriuras canditaturas per ils posts communals vegnir annunziadas. Las elecziun èn ils 25 da settember.

Artitgels legids il pli savens