Sco quai che la regenza scriva è vegnida approvada la zona speziala Catrina che pussibilitescha a las pendicularas da Mustér da construir il ressort cun var 700 letgs administrads, ustarias e butias. Las lavurs da construcziun per il ressort duain cumenzar la primavaira 2017.
Vinavant è era l’engrondiment da la zona da mastergn Pignola/Marias vegnida acceptada. Questa po vegnir engrondida per 6839 m2 e pussibiliteschia uschia a l’interpresa «Rhomberg Sersa Rail Group» da domiciliar in nov lieu da manaschi en la vischnanca da Mustér, communitgescha la regenza enavant. Tar l’interpresa sa tracta quai d’ina interpresa ch’è realisescha infrastructura da viafier. Sco quai che la pledadra da «Rhomberg Sersa Rail Group», Helene Rapold ha dentant confermà a Radiotelevisiun Svizra Rumantscha n'è quai project dentant betg pli uschè actual, perquai che Mustér na giaschia betg uschè ideal.
L’enzonaziun dad ulteriurs 20’000 m2 è vegnida sistida per il mument dal chantun. L’emprim stoppian las surfatschas da zona da mastergn existentas esser surbajegiadas avant che ulteriuras parcellas pon vegnir inzonnadas.
Era il hotel Disentiserhof che vul realisar in hotel da cura sper l’hotel existent è in pass enavant. La midada da zona enturn l’hotel ha stgaffì la basa persuenter. Sco quai che Rolf Engler, il president dal cussegl d’administraziun da la Mettlen Immo SA, la possessura da l’hotel, ha ditg avant curt ad RTR, vegnia ina concurrenza d’architectura lantschada suenter che il plan da zonas saja approvà.
Midada da zona el territori da skis da Mustér che lubescha da construir indrizs d’ennavar è anc betg vegnida approvada da la regenza. Sco quai ch’il president da vischnanca da Mustér, Francestg Cajacob ha ditg dovria quai dapli temp pervia da las organisaziun d’ambient che n’èn betg d’accord cun quai.
Il pievel da Mustér aveva approvà la revisiun parziala da la planisaziun locala ils 29 da november 2015.