Siglir tar il cuntegn

Header

cuntegn

Surselva Mustér – renovaziun da la claustra custa dapli

La renovaziun da l'intern da la claustra Mustér custa mez milliun francs dapli che planisà. Quai pervia da problems cun la statica da la baselgia.

Circa 150 donaturs e sponsurs èn s’entupads la sonda passada en la sala Peter Kaiser da la claustra da Mustér per in'infurmaziun davart las lavurs da renovaziun. L’avat Vigeli Monn ha pudì communitgar, che las lavurs vi da la fatschada sajan quasi finidas e las lavurs en igl intern da la baselgia vegnian a cumenzar il schaner 2018. El ha dentant era stuì infurmar ils preschents, che la renovaziun vegnia a custar in mez milliun francs dapli che planisà. Quai pervia da problems cun la structura dal bajetg.

Las fessas dals artgs che ston vegnir renovads èn bain visiblas.
Legenda: Las fessas dals artgs che ston vegnir renovads èn bain visiblas. RTR, C. Albin

Artgs instabils

Ils mirs che tegnian dus artgs da la baselgia sajan ids ord l’auter ed ils artgs perquai sfundrads. Tant ils mirs sco ils artgs stoppian uss vegnir rinforzads cun stangas da fier e quai chaschunia custs d'in mez milliun francs dapli che planisà, ha l’avat declerà. Quellas lavurs supplementaras sajan stadas ina surpraisa, pertge enfin uss hajan ils inschigners adina ditg che quai na saja betg in problem. Pir cun la planisaziun detagliada da la renovaziun interna saja la necessitad da far quellas lavurs da stabilisaziun vegnida clera.

Custs totals uss da 15,5 milliuns

Quellas lavurs auzan ils custs totals per la renovaziun da 15 sin 15,5 milliuns francs. Da quella summa ha la claustra gia rimnà 13,9 milliuns – 1,6 milliuns francs mancan pia anc. En la situaziun actuala da l’economia saja difficil da rimnar daners, l’avat Vigeli è dentant persvas che la summa vegnia ensemen enfin la fin dal 2019. La renovaziun cumpletta da l’intern da la baselgia cuzza numnadamain circa 2 onns e la reavertura è planisada ils 11 da november 2019; il di da S. Martin, il patrun da la baselgia claustrala.

audio
Bunura: Claustra Mustér – il stan da las renovaziuns
ord Actualitad dals 30.10.2017.
laschar ir. Durada: 2 minutas 16 Secundas.

Festas pli grondas en la baselgia dal vitg

Durant ils dus onns da la renovaziun resta la baselgia claustrala serrada. Durant quels dus onns dovran ils paders la baselgia da Nossadunna per far lur uraziuns ed era las messas vegnan tegnidas en quella baselgia. Per las festas pli grondas sco per exempel la festa da Son Placi, vul l’avat guntgir en la baselgia parochiala da Mustér. El n'haja dentant anc betg dumandà uffizialmain la plaiv da Mustér, sche quai saja pussibel.

RR actualitad 08:00

Artitgels legids il pli savens