Siglir tar il cuntegn
cuntegn

Surselva Mustér: Projects da las pendicularas chaschunan critica

Ch'i dat per ils 27 da november in cedel da votar cun si duas dumondas tar las pendicularas na plascha betg a tuts. Ils votants e las votantas han lura da decider da dus temas: In credit per il rempar da Val d’Acletta ed ils projects da las pendicularas da Mustér cun duas dumondas.

Quest cedel da votar dat da discurrer a Mustér.
Legenda: Quest cedel da votar dat da discurrer a Mustér. RTR, Gion Hosang

Ils critichers fan valair ch’ins na possia betg metter ils projects da las pendicularas sin il medem cedel da votar. Il president da la vischnanca da Mustér Francestg Cajacob di percunter, ch'i saja duas fatschentas che s’audian ensemen. Il chantun haja pretendì che quai saja ina fatschenta, perquai ch’els finanzieschian quests projects communablamain entras daners da San Gottardo.

Considerar a moda cumplessiva

Quai conferma il departament per economia publica cun in e-mail. I saja sco quai ch'il cusseglier guvernativ Jon Domenic Parolini haja ditg ad ina saira d’infurmaziun, numnadamain saja ina «ganzheitliche Betrachtung von Investitionen und Fördermitteln in Zusammenhang mit den Projekten in Disentis und Tujetsch ... von zentraler Bedeutung», e vinavant che «ohne das Progetto San Gottardo 2020 eine Finanzierung in dieser Höhe nicht möglich wäre.»

Francestg Cajacob fa era attent, che las pendicularas da Mustér stoppian tschainsir ed amortisar l’emprest da 2,5 milliuns francs. El saja persvadì, che la vischnanca na stoppia betg far diever da la garanzia da deficit da 2,5 milliuns francs da la confederaziun.

Per l'avegnir da la giuventetgna

Ed a quels che dian ch’il project na saja betg madir e ch'ins vess stuì spetgar fin che la vischnanca da Tujetsch presentia era ses messadi, respunda Cajacob, ch'i saja finalmain sin maisa in project per far vegnir dapli giasts ed i giaja era per l’avegnir da la giuventetgna.

I fiss stà bun sche las decisiuns fissan datiers ina da l’autra. Mo per els saja fitg impurtant, che Mustér fetschia sia obligaziun e sustegnia la colliaziun, che saja era lucrativa per ils giasts da la stad.