Siglir tar il cuntegn
cuntegn

Surselva Mustér: Opposiziun vers la nova lescha d'abitaziuns secundaras

La vischnanca da Mustér duai avair avunda chombras en ils hotels. Perquai propona la suprastanza en in messadi al cussegl da vischnanca ina nova lescha per abitaziuns secundaras.

Mustér
Legenda: Mustér RTR, G. Hosang

Hotels che na rendan betg, duain mo sut tschertas cundiziuns pudair midar 50% da las chombras en abitaziuns secundaras. Vul dir: L’hotel sto pudair cumprovar che sias fatschentas na rendan betg. Alura possian ins reveder la planisaziun locala a l’urna, sco il president communal da Mustér Robert Cajacob declera. La finala saja Mustér ina vischnanca turistica, ed ils onns passads sajan plirs hotels svanids. Gruppas pli grondas da giasts che vegnan a Mustér na chattian savens betg in suttetg.

I na dovria betg ina lescha nova

L’uniun da commerzi e professiun Mustér n'è betg cuntenta cun questa proposta. Il president Edgar Durschei di, che la vischnanca na dovria betg ina lescha nova – ina lescha che saja pli rigurusa che la lescha federala davart abitaziuns secundaras. Quella lubescha a hotels ch'existevan gia avant il 2012 (avant la votaziun davart abitaziuns secundaras), che han gia 25 onns e che na pon betg vegnir manà a moda rentabla, da midar 50% da las chombras en abitaziuns secundars.

Quai duai era esser uschia en la vischnanca da Mustér. Edgar Durschei di, ch’ins duai laschar liber quest spazi ch’ins haja. El haja pli gugent in hotel che ha midà la mesadad da las chombras en abitaziuns secundaras che ina ruina.

Votaziun a l'urna

Venderdis, ils 20 d’avrigl, decida il cussegl da vischnanca da Mustér davart la nova lescha per abitaziuns secundaras. Sch’el accepta quella sto il pievel prender posiziun a l’urna.

Plinavant vegn il cussegl orientà sur da la sanaziun ed il engrondiment dal Center da sport e cultura.

RR actualitad 07:00