Siglir tar il cuntegn
cuntegn

Surselva Mustér: L’arvieut da la baselgia claustrala vegn segirà

Suenter che la fatschada da la baselgia è vegnida sanada, cuntinueschan las lavurs en l’intern dapi l’entschatta da 2018. En ina emprima fasa han ins demontà e prendì ora bancs, altars, sculpturas e maletgs, candelabers, chaleschs, monstranzas, tschivlots da l’orgla ed auter pli.

Rusnas en l'arvieut.
Legenda: Rusnas en l'arvieut. RTR, Hubert Giger

Actualmain vegn sanà l’arvieut. Gia il 1996 han ins constatà che quel ha pliras sfessas. Ina part da quellas èn era sa furmadas dapi l’ultima restauraziun da 1920. Surtut en in cas dad in terratrembel pudess il tetg crudar ensemen. La finamira da las analisas è da stabilisar l’arvieut e da conservar el, vul dir era da restaurar ils maletgs.

Pliras mesiras cunter las sfessas

Ils mirs en l’intern da la baselgia n'èn betg colliads cun ils mirs externs. Perquai datti defurmaziuns e sfessas. Mo tuttina saja il fundament stabil, declera l’inschigner Iso Mazzetta. Cunter las sfessas gidan principalmain quatter mesiras:

  • Ina emprima mesira saja dad emplenir las sfessas.
  • Ina segunda è in sistem da stangas d‘atschal sin la autezza dals chapitals (quellas pon ins vesair). Uschia pon ins mantegnair il meglier la substanza da construcziun istorica.
  • La terza mesira è da furar rusnas en ils mirs e da tschentar en là ancras (da per part 9 meters) per stabilisar l’arvieut cun stangas.
  • La quarta mesira è da fixar las paraids da l’arvieut ch'èn libras cun ina construcziun d’atschal en la tetgala.

Lavurs finidas il november 2019

Il tetg stoppia esser en urden, di l’architect Matthias Schmid. Sch’ins segirescha l’arvieut possian ins era gist restaurar ils maletgs. Plinavant ston l’acustica, il stgaudament e la glisch da la baselgia vegnir adattadas als basegns dals paders e dals visitaders. Ed alura ston ins tschentar enavos tut quai ch’ins ha prendì ord la baselgia. Schmid quinta che las lavurs sajan finidas il november 2019.

La restauraziun da la baselgia da la claustra da Mustér custa 15,5 milliuns francs. La gronda part da questa summa, 13,9 milliuns, è rimnada. Durant la restauraziun resta la baselgia serrada.

RR actualitad 17:20