Ina da las emprimas chasas d'albiert ch'i ha dà a Mustér è probabel il «Gasthaus zum Löwen». La chasa exista anc oz – è dentant enconuschenta sco «Stiva Grischuna». Sco il possessur Norbert Maissen di, quintan ins che la miraglia da la chasa dateschia dal 1700.
La chasa sezza ha survegnì sia cumparsa actuala suenter il brischament da 1799 entras ils Franzos enturn 1800. Dapi che Norbert Maissen ha cumprà la chasa, na vegnan dentant naginas chombras pli laschadas a tschains.
1877 è vegnì bajegià il «Hotel Disentiserhof». In hotel da cura per persunas noblas. 1967 è quel dentant vegnì serrà e 1978 è il bajetg vegnì siglientà da l'armada. 1886 è il «Gasthaus zum Oberalp» vegnì construì. Il hotel datti anc oz, dentant cun il num rumantsch «Hotel Alpsu».
Enturn 1910 ha la famiglia Giger bajegià il «Hotel Lukmanier». Quel è vegnì manà da la famiglia fin il 2001. El è vegnì spazzà. En quest lieu è la Banca Chantunala Grischuna. Uschia pudess'ins anc cuntinuar cun il «Hotel Belevue» respectiv avant «Hotel Berther» u cun il «Gasthaus Central», ni il «Hotel Post» ed auters.
Nov schlantsch ils onns 70
Ils onns 1970 ha lura il turissem d'enviern cumenzà. Quai cun l'hotel «Acla da fontauna» e la construcziun da las pendicularas. Suandads èn per exempel il «Hotel Cucagna», u lura era il nov «Hotel Disentiserhof». Il turissem d'enviern è stà en cumplaina fluriziun.
2001 ha lura il «Hotel Acla da Fontauna» serrà sias portas, 2015 il «Hotel Cucagna» e 2016 il «Hotel Disentiserhof». Entant ch'i ha dà ord dal «Hotel Cucagna» abitaziuns, vul ins construir sper ils bajetgs existents dal «Disentiserhof» cun sias 150 abitaziuns ina hotel da cura. Pli concrets èn ils plans per il «Hotel Acla da fontauna»: Là datti gia investiders; ins spetga la dumonda da bajegiar il proxim temp.
RR actualitad 07:00