Siglir tar il cuntegn

Header

cuntegn

Mustér Il parlament da la vischnanca ha refusà moziun cunter luf

La moziun «Il delinquent luf» pretendeva da la vischnanca da tschertgar ina soluziun cun la regenza grischuna en connex cun lufs che sa chattan savens en vischinanza d’umans e vitgs. La moziun na possia betg vegnir sustegnida, perquai che la basa legala manchia, uschia la suprastanza communala.

Il parlament da la vischnanca da Mustér ha refusà la moziun cun 8 cunter 4 vuschs. Uschia suonda il parlament a la proposta e l'argumentaziun da la suprastanza.

Preschents a la sesida dal parlament communal era il parsura da l'Uffizi da chatscha e pestga Adrian Arquint ed il capo guardiaselvaschina regiunal Ueli Jörimann. Els han empruvà da declerar la situaziun dal chantun. Uschia sajan ins pir incumbensads da reagir cura ch'i dettia donns. Quai na saja betg ina situaziun cuntentaivla, uschia Adrian Arquint. I fetschia er basegn d'ina definiziun d’in dumber da lufs minimal en Svizra. La situaziun saja quella che la populaziun dal luf haja cuntanschì cun radund 150 animals in dumber ch’el na svanescha betg pli uschè svelt. La populaziun vegnia pli anc a crescher il proxim temp, uschia quintian ins cun ina dublaziun da la populaziun mintga dus fin trais onns. Perquai saja necessari e prudent da definir quest dumber minimal, uschia Adrian Arquint. Uschia pudess era vegnir stgaffì ina basa per pudair propi far in management dal luf, sco per exempel tar il capricorns, e tar in tal management saja era necessari da regular il dumber.

audio
Moziun cunter il luf – influenza sin decisiuns dal chantun?
ord Actualitad dals 29.01.2022.
laschar ir. Durada: 3 minutas 36 Secundas.

Revisiun da la lescha da chatscha federala

Il mument saja il chantun en la situaziun ch’els stoppian observar las tractativas da la revisiun da la lescha da chatscha en il parlament a Berna. Uschia dettia per il mument per exempel sulettamain la pussaivladad da regular trieps da lufs e betg lufs singuls. Quai saja ina problematica ch’ins haja pir uss realisà e qua saja spazi d’agir, uschia Adrian Arquint. La discussiun sa svillupeschia en la dretga direcziun. Pli blers chantuns ch’èn pertutgads da la problematica luf e pli probabel ch'i vegnia a dar en futur soluziuns da pudair regular il dumber da lufs en Svizra, uschia il parsura da l'Uffizi da chatscha e pestga. La finamira restia d’avair lufs timids ch’eviteschan il contact cun umans, e da pudair regular lufs cun in cumportament problematic – vul dir che s’avischinan ad umans u pericliteschan quels.

Luf problematic è probabel vegnì sajettà

Ch’ins haja la notg dals 20 da schaner propi sajettà in dals lufs problematics, saja probabel, perquai ch’ins n’haja betg registrà pli disturbis u inscunters problematics cun umans, uschia il guardiaselvaschina responsabel Ueli Jörimann. En tut sajan quella notg stadas en acziun nov persunas da l'Uffizi da chatscha ed il plan saja reussì sco giavischà. Il mument vivian en la regiun da la Cadi dus trieps da lufs. Il triep da Stagias, sin territori da las vischnancas da Mustér, Medel e Tujetsch haja il mument 6 animals. Quest triep fetschia da principi paucs problems e vivia timid. In segund triep sin intschess da las vischnancas da Sursaissa, Breil, Trun, Sumvitg e Lumnezia, saja il triep da Valgronda. Quel na saja betg reproducì l’onn passà e la surveglianza da chatscha quinta cun trais animals. In luf mastgel ed ina femella sajan era vegnids observads en la Val dal Blegn, ma circuleschia era regularmain sin territori grischun, surtut en la Val Cristallina e la regiun Pass dal Lucmagn. Ultra da quai saja adina d’observar lufs singuls, in da quels lufs singuls saja lura era vegnì sajettà la notg sin ils 20 da schaner, uschia Ueli Jörimann.

RTR novitads 06:00

Artitgels legids il pli savens

Scrollar a sanestra Scrollar a dretga