Siglir tar il cuntegn

Header

Navigaziun

Il "baun da W-Lan" è anc vit
Legenda: Il "baun da W-Lan" è anc vit RTR, H. Giger
cuntegn

Surselva Mustér: Il banc da WLAN per requirents d’asil

En il center d’asil a Mustér na datti betg ina colliaziun cun l’internet. Mo tuttina han ils requirents chattà ina via per avair in access.

Adina puspè pon ins vesair requirents d’asil che sesan sin il banc avant la chasa communala. Dus dad els, in giuven da la Somalia ed in da l'Eritrea, han confermà ad RTR ch’els sajan là perquai ch’els hajan ina rait d’internet.

Vischnanca n'ha betg ina rait libra d'internet

Quai conferma il president da vischnanca da Mustér Francestg Cajacob. Ils requirents d’asil hajan chattà access ad ina rait d’ina persuna privata. Mo i dettia nagins problems ed er naginas reclamaziuns.
La vischnanca na mettia dentant betg a disposiziun ina rait d’internet gratuita. Il motiv è ch’en vischnanca sajan memia paucas persunas sin in grond spazi ed ultra da quai na sajan ils custs d’internet sa reducids ils ultims onns e perquai na saja quai betg in problem finanzial pli.

Televisiun ubain internet?

Era en il center d’asil a Mustér na datti betg internet. Sco Georg Carl da l’Uffizi chantunal da migraziun di, stoppian els decider mintgamai tranter avair televisiun ubain internet. En quest cas hajan ils requirents d’asil ina televisiun en mintga chombra, perquai ch’il bajetg era pli baud in hotel/hostel. Mo els veglian ponderar sch'i na fiss betg pussaivel dad er installar en l’avegnir ina rait d’internet per ils requirents d’asil.