Siglir tar il cuntegn

Header

cuntegn

Mustér Cussegl communal di Gea al nov project «Val Segnas ed Uaul Run»

A Mustér ha il cussegl da vischnanca approvà il nov project «avertura Val Segnas ed Uaul Run» unanimamain ed uschia concedì in credit da 5,66 milliuns francs. Il project duai far accessibel la Val Segnas e la Val Son Placi. I va tranter auter per garantir la tgira dal guaud da protecziun u er per garantir l'access en cas d'eveniments sco da privels da la natira u tar incendis da guaud.

Ina nova varianta dal project

Suenter ch'il prim project era vegnì refusà il november 2020 a l'urna, han ils responsabels ensemen cun l'Uffizi regiunal da guaud e privels da la natira elavurà ina nova varianta per l'avertura Val Segnas e dal guaud Run. Entant che la prima varianta avess previs ina colliaziun senza interrupziun tranter la Val Segnas e la Val Sogn Placi, prevesa il nov project da realisar ils access necessaris en duas parts. Las finamiras èn restadas las medemas: garantir la tgira dal guaud da protecziun, pussibilitar l'access per intervenziuns e mantegniment en cas da privels da la natira u incendis da guaud, reducir la canera d'helicopter a lunga vista, sviar il traffic or dal vitg ed uclauns e reducir ils custs da mantegniment d'infrastructura.

Per realisar il project vegn mess en mira ina contribuziun da la Confederaziun e dal chantun da fin 78%. Alpinfra vul surpigliar 20% fin 30% dals custs restants. Per la vischanca resta uschia anc la cumpart da 5,66 milliuns francs ch'il cussegl da vischnanca ha uss approvà sco credit. L'ultim pled ha però er tar la nova varianta il pievel a l'urna. La votaziun duai tneor la vischnanca succeder ils proxims mais.

Protecziun da las auas

La raschun principala daco ch'il pievel aveva refusà il project il 2020 era la protecziun da las auas. Cun il nov project han las sfidas oravant tut davart las zonas per la protecziun da las funtaunas pudì vegnir risguardadas entras evitar la traversada da la Val Clavaniev. Il perimeter dal project vegn uschia repartì sin duas parts, numnadamain Uaul Run cun emprima prioritad e Val Segnas – Prau Sura.

La part dal guaud Run ha prioritad perquai ch'i sa tracta dal pli impurtont guaud da protecziun da la vischnanca. Plinavant èn passads gia 20 onns dapi ils prims scleriments per meglierar l'access al guaud.

Center Fontauna

Il cussegl communal ha plinavant decis dad er en l'avegnir porscher in glatsch artifizial tar il Center Fontauna.

RTR novitads 10:00

Artitgels legids il pli savens