Mustér: Center da sport e cultura duai investir a moda ponderada

La cumissiun dal Center da sport e cultura (CSC) ha incaricà la scol’auta per tecnica ed economia da sclerir co ch'ins possia sanar il center. Ina conclusiun impurtanta è da far mo las investiziuns da mantegniment las pli necessarias.

Lavurs vid il CSC

Legenda da maletgs: Lavurs vid il CSC RTR, H. Giger

Opiniuns divergentas pertutgant la plazza da glatsch

Il studi constatescha tranter auter che la vischnanca da Mustér stuess dentant investir surtut en las hallas da sport e la halla da tennis sco era en la plazza da glatsch. Ma gist questa plazza chaschuna discussiuns. Ils auturs dal studi scrivan ch’ins na dastga era betg temair da serrar questa plazza. D’ina autra opiniun èn la suprastanza e la cumissiun dal CSC. La plazza da glatsch saja ina purschida impurtant per la vischnanca, per la regiun ed il turissem, di Clemens Berther che presidiescha la cumissiun. Perquai hajan els era dumandà il cussegl da vischnanca: glatsch gea ubain na. Sch’ins dia dentant gea stoppian ins era cumprar ina maschina nova da schubregiar glatsch. La veglia haja 49 onns.

Il CSC da la vart sut

Legenda da maletgs: Il CSC da la vart sut RTR, H. Giger

Custs dad 1 milliun francs

Els sajan dentant conscients ch’il CSC na rendia betg. Tenor il studi custia quel mintg’onn a la vischnanca da Mustér ca. 1 milliun francs inclusiv contribuziuns a scolas ed uniuns, amortisaziuns e tschains). Sco Clemens Berther di na dastga la vischnanca dentant resguardar mo las finanzas, mo bain era ils avantatgs per scolas ed uniuns e la valur
turistica dal center.

La plazza da ballape

Legenda da maletgs: La plazza da ballape RTR, H. Giger

Mantegnair e modernisar cun reducir ils custs

Era sch’il studi recumonda da investir a moda ponderada, ston ins renovar il CSC. Impurtant saja tenor il president da la cumissiun ch’ins mantegnia il bajetg, surtut era per spargnar energia.
La finamira è da mantegnair e modernisar il CSC cun reducir ils custs.