Quatter da tschintg suprastants da la vischnanca da Mustér, na candideschan betg per ina ulteriura perioda d’uffizi. Tranter auter era il president communal, Frascestg Cajacob. Uschia cumenzan uss las speculaziuns.
Specular pudess ins per exempel davart ina candidatura da Linus Fry che ha candidà avant quatter onns encunter Francestg Cajacob. Mo sco ch'el ha ditg n'haja el nagin interess. «Jau haja emprendì l’ultima giada che la populaziun da Mustér na stima betg mia prestaziun da lavur ed uschia fiss jau tup dad anc ina giada candidar». Era il suprastant Iso Mazzetta che candidescha sco sulet anc ina giada n’ha nagin interess. El fetschia gugent la lavur sco suprastant ed haja uschia gia avunda lavur sper la fatschenta. Vinavant manegia Iso Mazzetta, ch’el sappia tge abilitads ch’el haja. Quellas per presidiar ina vischnanca n’haja el dentant betg. Tuttina argumentescha era la cussegliera Rita Huonder.
Be paucs nums curseschan
In num ch’ins auda adina puspè en connex cun ina candidatura pussaivla per il presidi è quel dad Edgar Durschei, Clemens Berther ed Erwin Caminada. Tuts trais punctueschan ch’ina tala candidatura na saja absolut nagin tema per els.
Sulet il deputà Heinrich Berther n’ha betg laschà guardar en las chartas. RTR ha dumandà el avant la communicaziun uffiziala che Francestg Cajacob na candideschi betg pli, sch’el candidass. Sin quai ha el manegià: «Sche quai vegniss lura tema, sche stuess ins far las ponderaziuns necessarias. Actualmain n’è quai dentant betg in tema per mai».
Schizunt sur cunfin
Aifer las discussiun crodan era nums da persunas ch’abitan betg en vischnanca. Uschia per exempel il deputà dal cussegl grond da Tujetsch, René Epp. El haja dentant nagina intenziun da candidar, declera René Epp.
Cumissiun tschertga candidats
Sut il presidi da Duri Huonder, anteriur suprastant, vegn proximamain ina cumissiun a sa metter a la lavur dad tschertgar candidatas per las autoritads communalas. Las elecziuns èn il settember 2016.