Mustér: Cameras han filmà il lader

A Mustér ha la polizia arrestà la mesemna in lader che ha commess plirs delicts. L'um duai tranter auter avair rut en en duas fatschentas da la regiun nua ch'el ha engulà rauba e daners en la valita da plirs tschients francs.

In passant a Mustér ha a las 22:50 la mesemna saira annunzià a la polizia ch'el haja vis ina persuna suspectusa sin l'areal da d'industria. L'um saja charrà davent cun in auto, scriva la polizia chantunala.

lader ch'ê rut en a Mustér.

Legenda da maletgs: Schiba destruida. Remo Huonder

Curt avant veva el rut en la garascha Huonder. Cameras hajan filmà l’acziun, sco Remo Huonder ha raquintà ad RTR. Malgrà il vaider da segirtad ha el pudì stuschar en ils roms da la fanestra, suenter ch’el aveva prendì chatsch duas giadas cun l’auto. L’um haja engulà daners, laptops e vignettas. La notg vers 1:30 haja la polizia telefonà a ses bab, di Remo. I saja l’emprima giada ch’in lader rumpa en tar els.

Auter èsi tar la fatschenta vischina, la Barit Baubedarf. Là èn laders gia stads pliras giadas en acziun ed han engulà pli baud in tresor (mesemna saira ha il delinquent prendì in pèr tschient francs).

L'um ha alura empruvàda fugir. Mo la finala ha ina patruglia da la polizia pudì fermar l'auto en vischnanca. Sin la fugia è il manischunz però collidà cun l'auto da polizia e pli tard lura ì surengiu cun l'auto ch'el aveva engulà a Sedrun. Cura ch'el n'ha betg pli pudì ir vinavant cun l'auto è el fugì a pe. Curt suenter ha la polizia pudì arrestar l'um.
Sco la polizia communitgescha sa tracta quai da donns da passa 10'000 francs. La polizia chantunala e la procura publica interqueran il cass, scoi para n'èsi betg l'emprima giada che quest um commetta in delict.

RR novitads 18:00