Ils 5 da matg è il di internaziunal da l’egualitad per persunas cun impediments. Per far attent spezialmain sin las malsognas dal cor datti in’acziun cun il num «Mussa cor, porta cotschen» u per tudestg «Zeig Herz, trag rot». Per questa acziun han las scolaras da la scola superiura fatg chapitschas cotschnas che vegnan repartidas en ils ospitals en l'entira Svizra ils 5 da matg. Las chapitschas cotschnas èn per tut ils uffants che èn quest di en in ospital. La chapitschas duain simbolisar solidaritad cun ils uffants che han ina malsogna dal cor.
Las scolaras da la Lumnezia han fatg las chapitschas voluntari. Lur scolasta Pierina Cabalzar-Caminada ha gì l’idea da sa participar a quest'acziun e las 22 scolaras èn stadas fieu e flomma.
Gia avant in temp han ellas gì da far e furnir la chapitschas a l’uniun «Fontanherzen Schweiz». Quest’uniun ha procurà per la repartiziun da las chapitschas en tut ils ospitals da la Svizra. Nua che lur chapitschas èn propi vegnidas repartidas na san la scolaras da la Lumnezia betg. Ellas san mo, che lur lavur n'è betg stada per nagut.