Anc avant ch’il Museum regiunal da la Surselva avra uffizialmain sias portas suenter la renovaziun, datti uss ina exposiziun speziala cun il tema «Il privel alv. L'agir cun lavinas en Svizra». L’exposiziun è vegnida averta ils 31 da matg e dura fin ils 31 d’october.
Exposiziun ambulanta
Concepida è l’exposiziun vegnida dal Museum Alpin Svizzer a Berna e sin sia emprima staziun vegn el a Glion en il Museum regiunal da la Surselva. La curatura e manadra dal museum Ursina Jecklin ha surpiglià l’incumbensa nova l’entschatta avrigl, ma ella ha gia pudì collavurar dapi il november per concepir questa exposiziun. Uschia ha ella era gist pudì realisar en collavuraziun cun sia antecessura Marianne Fischbacher questa exposiziun.
Bler è interactiv
Ils otg temas da coc, la protecziun da lavinas, la planisaziun dal territori, la perscrutaziun da lavinas, l’analisa dal ristg, la destrucziun, il salvament, ma era ils temas regurdientscha e cardientscha, chattan plaz sin elements concepids sco vairs paralavinas cun blers elements multimedials e bleras fotografias. Surtut il tema regurdientscha e cardientscha cun las chanzuns da cordoli per las unfrendas da lavinas, saja in stgazi cultural da la Surselva e probabel unic en Svizra, di Ursina Jecklin.
Museum en nova glisch
Il Museum regiunal è vegni renovà ils ultims mais. Surtut saja l’ascensur vegnì integrà en il bajetg istoric uschia che l’access era per persunas cun impediments saja garantì. Era il concept da glisch saja vegnì fatg dal tuttafatg nov e dettia al museum sco tal, ma surtut era a las exposiziun spezialas ina tempra extraordinaria, di Ursina Jecklin.
RR actualitad 11:00