Siglir tar il cuntegn
cuntegn

Surselva Moesano: Idea d’in parc natiral viva anc

L’idea d’in parc natiral en las vals Mesauc e Calanca n’è betg morta cun il naufragi dal Parc Adula.

Charta cun ils resultats dal Parc Adula.
Legenda: Il Moesano ha votà per il Parc Adula. Grafica RTR

Las vischnancas Buseno, Calanca e Rossa en la Val Calanca e las vischnancas Soazza e Mesocco en la Val Mesauc han tuttas ditg gea al Parc Adula. Suenter il naufragi dal parc viva l’idea per ina parc natiral regiunal perquai vinavant, sco ils presidents communals da Mesocco, Christian de Tann, e da Calanca, Rodolfo Keller, han confirmà a RTR. I saja dentant memia baud per insumma far ina skizza d’uschia in parc. L’emprim stoppian las vischnancas seser ensemen e decider, sch’ellas veglian insumma persequitar quella idea.

Interess da Valragn

Era da la vart nord dal Pass dal S. Bernardin, a Valragn, pudess in tal parc regiunal survegnir sustegn. Era quella vischnanca ha acceptà il Parc Adula e tenor il president communal Georg Trepp saja la vischnanca avisada sin bunas ideas per promover il turissem e l’economia. Il Parc Adula fiss stà in tal project, in parc regiunal ensemen cun las vals Mesauc e Calanca pudess esser in tal project. Seser ensemen in giada cun las vischnancas pertutgadas fiss segir ina buna entschatta.

RR actualitad 17:00