Modest Maissen e sias bandieras

A la fin dal vitg da Sumvitg en direcziun da Cuira dat ina chasa en egl: Avant quella pendan trais bandieras, e mintg’emna – almain la stad – èsi autras. Bandieras èn il hobi da Modest Maissen (el veva pli baud ina scrinaria).

Modest Maissen

Legenda da maletgs: Modest Maissen RTR, H. Giger

El penda si mintgamai trais bandieras tenor in tschert sistem: per exempel en connex cun tscherts eveniments. Modest Maissen numna l’exempel dal Brexit. Quest di haja el mess si la bandiera englaisa, quai dentant sin mesa asta per protestar encunter la decisiun.

50 exemplars

L’um dad 82 onns è in grond adherent da l’Uniun europeica; e perquai ha el quasi tut las bandieras da l’Europa. El e sia dunna èn stas en plirs pajais, e da mintgin da quels posseda el ina. En tut ha da quai da 50 exemplars, e tranter auter veva el era ina da la NATO. Mo quella haja insatgi engulà.

Ses hobi

Modest Maissenna maschaida dentant betg las bandieras europeicas e svizras. E sa chapescha ch’el ha era ina da la vischnanca da sia dunna, da Etziken en il chantun Solothurn. El ha cumenza avant passa 20 onns a rimnar bandieras. Quai saja ses hobi. Cura ch’el ha bajegià chasa e sutvi la garascha haja el laschà construì stgalims per tschentar si trais astas. Las bandieras ha el deponì en ina stgaffa en garascha. Las proximas ch’el vul cumprar èn ina da la Tunesia ed ina da la Spagna.