Siglir tar il cuntegn

Surselva «Mo fundar in parc na tanscha betg»

In parc da la natira po purtar insatge, quai dentant mo sch’ils abitants èn conscients ch’i ston era contribuir lur part londervi. Quai è stà il messadi dals participants da la discussiun da podium che la Pro Parc Adula ha organisà a Sumvitg.

Jürg Inerbitzin, Jon Domenic Parolini, Batist Spinatsch, Carmelia Maissen ed Otmar Seiler
Legenda: A Sumvitg è vegnì discussiunà davart il motor economic ch'in parc da la natira po esser. RTR, G. Hosang

Pudess il Parc Adula dar novs impuls ed uschia daventar in motor per il svilup regiunal è tranter auter stà la dumonda, ch’è vegnida discutada a chaschun d’ina discussiun al podium.

Discutà han, Domenic Parolini, il schef dil departament d'economia dal grischun; Carmelia Maissen sviluppadra regiunala regioViamala; Jürg Inderbitzin da la scol'auta da Lucerna, che ha gidà da sviluppar il project da Biosfera Entlebuch ed il cussegliader puril Batist Spinatsch. Tuts èn da l’opiniun ch’in parc da la natira po esser in motor per il svilup regiunal, mo quai funcziuna be sch’era la populaziun è innovativa.

L’experientscha mussa ch’in parc po esser il motor

Jürg Interbitzin ha fatg l’experientscha tar la Biosfera Entlebuch ch’ins vegn da vender meglier ils products cun il label da la biosfera. Il medem ha era Batist Spinatsch constatà en la Val d’Alvra nua ch’ils purs han tratg a niz il Parc Ela per vender lur products.

Legenda: Guardar il video «Biosfera Entlebuch – Era il mastergn po profitar». Durada 3:47 minutas.
Or da Telesguard dals 16.09.2015.

Interessantamain procuran persunas innovativas ed activas era per ina buna concurrenza. Sco quai che Jürg Inderbitzin di, pensian ils auters: quai che quel sa quai sai jau era, e gia dettia quai ina sauna concurrenza. Carmelia Maissen ha pudì far l’experientscha che buns projects na vegnian magari betg realisads pervi da mancanza da resursas. In parc haja dentant resursas e possia uschia gidar e dar il stausch ch’i dovria per realisar il project.

I dat in martgà per products ord regiuns da parcs

Ina recumandaziun sche la populaziun duaja dir gea u na al Parc Adula, ha il schef dal departament d’economia Jon Domenic Parolini betg vulì dar. «La populaziun duai laschar infurmar bain e lura pasar giu ils arguments pro e contra, decider e star davos la decisiun» ha el ditg. In martgà persuenter dettia quai dentant en mintga cas. Tar persunas ch’abitan en las citads creschia il desideri per la natira e products natirals ha el ditg.