La regenza grischuna decida proximamain tgi che survegn l’incumbensa da manar davent da 2018 la centrala dal clom d’urgenza 144. Sco Rudolf Leuthold, il manader da l'Uffizi da sanadad dal Grischun ha ditg a Radiotelevisiun Svizra Rumantscha dettia quai duas offertas. Urs Kellenberger, il manader dal Spital regiunal Surselva ha confermà ch’ina da questas offertas saja dal spital a Glion. Tenor el è l’experientscha ch’ins haja fatg dapi 1999 a Glion cun manar la centrala dal clom d’urgenza in avantatg per lur offerta. I saja dentant in disfavuraivel mument per la crisa actuala tar la centrala. Il manader da la centrala dal clom d’agid e sia substituta han numnadamain visà lur plazzas. Quai pudessi avair influenza per la decisiun da la regenza, tgi che survegn la finala l’incumbensa dal chantun.
Spital e chantun ston intervegnir
Il clom d'agid 144 a Glion è en privel dad esser bainprest senza timun. Sch’il Spital regiunal Surselva a Glion ed il chantun n'intervegnan betg, na funcziuna il servetsch betg pli la fin dal mais.
Tenor la gasetta Südostschweiz hajan las visadas da plazza da far tranter auter cun la structura d'organisaziun dal clom d'agid.
Ils servetschs da salvament, ch'ageschan a moda autonoma en il chantun, ed ils medis da servetsch na sa tegnian savens betg vid las ordinaziuns da la centrala operativa, uschia che quella na possia far nagut.
Chantun è infurmà
In ulteriur motiv per las desditgas èn era discharmonia cun ils responsabels dal chantun, quai tenor insiders. Rudolf Leuthold, il manader da l'uffizi da sanadad dal Grischun ha declerà ch'els sajan infurmads davart la situaziun da persunal tar il clom d'agid 144. El ha era fatg attent ch'en emprima lingia saja l'ospital regiunal a Glion responsabel per il manaschi da la centrala. Els sajan dentant era activs. «Nus stain en contact permanent cun l'ospital a Glion ed examinain mesiras effectivas», ha ditg Leuthold envers la gasetta.
RR novitads 7:30/11:00