Sia exposiziun porta il titel: «Cun il temp». Ses maletgs ch’èn savens plain colurs sa fatschentan surtut cun il temp d’uffanza e da giuventetgna, per ex. cura ch’el fascheva chavrer, cura ch’el era famegl tar purs, cura ch’el sunava en la musica dal vitg ni durant ch’el deva ballape.
Jau vi dar mia atgna interpretaziun ad in maletg.
Lucas Tomaschett lavura cunzunt cun l’art dal cubissem sco quai che ses artists preferids Pablo Picasso, Juan Gris ubain Romero Britto fan/faschevan. «Il cubissem è per mai ina pussaivladad da reducir situaziuns», uschia Tomaschett. «Jau n'hai betg dà paisa da malegiar insatge uschè realistic sco pussaivel. Jau vi dar mia atgna interpretaziun ad in maletg.»
Malegiar è per el in cuntrast cun la lavur. Tomaschett è engaschà tar ina firma d’electricitad ed el haja da far bler cun planisaziun. L’exposiziun en il Museum Sursilvan Cuort Ligia Grischa a Trun saja sia emprima exposiziun. Per quella ha el mess a disposiziun 41 maletgs. Quels pon ins anc vesair ed admirar fin ils 5 da settember.