Siglir tar il cuntegn
Inhalt

Surselva Meztga da chasa – tranter tradiziun e temp modern

Pli baud gievi per nutrir la famiglia, tut capitava en in lieu, a chasa – ozendi èn las lavurs repartidas e sa midadas. Ma era l'intent n'è betg pli il medem. Oz è meztga da chasa per blers era simplamain la chaschun da pudair ir en l'ustaria e giudair ils products tradiziunals.

Il mazler da Glion Eros Bonolini è in dals mazlers che pratitgescha la «meztga da chasa moderna». Quai munta d'ina vart ch'er el na fa betg sez tut ils pass da la meztga. Bain organisescha el per exempel portgs ed elavura la charn, il mazzar na capita però betg tar el. Tar ses clients tutgan privats, indigens e turists, ma er ustarias, fin tar la categoria da gourmet che vulan porscher ils products dalla meztga da chasa.

Meztga da chasa en collavuraziun cun il mazler

Blers privats ed era purs che vulan far meztga da chasa na pon pervia da las prescripziuns betg pli far tut las lavurs a chasa. Saja quai lura perquai ch'i n'è betg lubì da tegnair be in portg u perquai ch'i chaschunass memia auts custs per endrizzar il local da meztga tenor la lescha.

Uschia è sa sviluppà cun il temps ina furma da collavuraziun tranter clients e mazler. Blers empostan la charn, fan sez a chasa la maschaida cun spezarias ed autras ingredienzas e laschan lura per exempel far il mazler las liongias ora da quella.

Eros Bonolini ha er constatà ch'i dettia adina daplirs che chattan recepts vegls dal tat u da la tatta. Quels vegnian lura e dumondan sch'els na pudessan betg empruvar ora quel en la mazlaria nua ch'i ha tut las maschinas ed er las ingredienzas.

RR actualitad 11:00

Manaschi da bab e figlia

Lia ed Eros Bonolini
Legenda: Lia ed Eros Bonolini. RTR, Gion Gieri Flepp

Eros Bonolini lavura dapi 33 onns sco mazler. Emprendì ha el sco sia figlia Lia da cuschinier. Uss lavuran els dapi quatter onns ensemen en la mazlaria che sa chatta en l'anteriura cuschina dal militar en la zona d'industria dador Glion.