Siglir tar il cuntegn

Header

cuntegn

Surselva Mesiraziun d’aua a Glion

Dapi passa 150 onns vegn mesirà en Svizra en rodund 260 lieus, quant’aua che va dals flums giu e cun tge temperaturas. Dapi 1914 schabegia quai era a Glion.

La staziun da mesiraziun sa chatta rodund 50 meters a val da la punt da Glion, da la vart dretga dal Rain. En ina pitschna chasa da betun alva cun in tetg da sturs mesira Andreas Kohler da l’Uffizi federal d’ambient la quantitad e la temperatura dal Rain Anteriur. Cun las datas d’in radar, da sensurs per mesirar la pressiun da l’aua e d’auters instruments, calculescha in computer trasora la quantitad d’aua che curra dal Rain giu.

Andreas Kohler en la chasa da mesiraziun a Glion.
Legenda: Andreas Kohler en la chasa da mesiraziun a Glion. RTR, C. Albin

Calculaziun precisa

Cun tut quels instruments, sa vegnir calculà la quantitad d’aua cun ina exactadad da plus minus 4%. Las datas vegnan tramessas directamain a Berna en in center da calculaziun, nua che tut las infurmaziuns da tuts puncts da mesiraziun da l’entira Svizra vegnan rimnads. Quellas datas stattan lura a disposiziun per elavurar p.ex. prognosas durant inundaziuns.

Stad 2015 betg stad da record

La stad 2015 saja stà ina stad cun pauc aua en ils flums. La quantitad na saja dentant mai stada sin in livel critic. D’enviern haja il Rain savens anc bler pli pauc aua. Percunter haja la temperatura da l’aua bunamain cuntanschì in nov record. Ils 6 d’avust 2015 ha Andreas Kohler registrà ina temperatura da 18,5 grads. Il record fin uss tegn la stad 2006 cun ina temperatura da l’aua da 18,7 grads.

Nagin problem per ils peschs

Tenor Marcel Michel da l’uffizi da chatscha e pestga dal Grischun, na èn las temperaturas da l'aua plitost autas betg in problem per ils peschs. Temperaturas tranter 14 e 17 grads sajan quasi temperaturas idealas per litgivas. Pir davent da rodund 22 grads savess i vegnir privlus per ils peschs. Marcel Michel na crai era betg, che las temperaturas da l'aua hajan gì influenza sin la quantitad da litgivas pigliadas quest onn. I dettia anc blers auters elements sco l'aura ni da tgai uras che i vegni pestgà, che influenzeschian il success dals pestgaders.

Artitgels legids il pli savens