L’incumbensa per sclerir la situaziun areguard lavinas sin la via tranter Sumvitg e Mustér, ha la regenza survegnì dal deputà dal Cussegl grond Clemens Berther. Adina puspè vegnia la via serrada ord raschuns da segirtad. E tut tenor la stagiun d’enviern sajan 5’000 fin 15’000 persunas pertutgadas. Ed era la lingia da la Viafier retica saja pertutgada.
Quai betg
En sia resposta sa mussa la regenza conscienta che la via da Sumvitg a Mustér ha ina gronda muntada per la part sura da la Surselva, sco era en vista als dus pass Lucmagn ed Alpsu. Ella na vesa dentant nagina pussaivladad a vista pli curta, da bajegiar ina nova via che guntgiss il traject cun privel da lavinas, sco proponì da Clemens Berther. Ed er in tunnel na vegn betg en dumonda per la regenza.
Vegn sclerì
Pronta è la regenza dentant da sclerir ulteriuras installaziuns per meglierar la protecziun da la via. Quai èn tenor la dumonda da Clemens Berther in’installaziun per sajettar lavinas en la Val Lumpegna, ed in radar per pudair serrar tenor situaziun da lavinas la via sut la Val S. Placi.
RR novitads 09:00
