Siglir tar il cuntegn

Surselva Meglieraziun funsila a Mustér è sut tetg

Ils da Mustér dian gea a la meglieraziun funsila ed approvan uschia in credit brut da 30 milliuns francs. Tar ina participaziun da bun 41 pertschient han 398 votantas e votants ditg gea, 225 èn stads encunter.

Vista sin la vischnanca da Mustér.
Legenda: Vista sin la vischnanca da Mustér. graubuenden.ch

La vischnanca da Mustér ha approvà in credit brut da 30 milliuns francs per il project da la meglieraziun funsila.

La finamira da la meglieraziun funsila da Mustér è da guardar che la cuntrada salvia sia fatscha; da mantegnair, sanar ed engrondir ils manaschis purils; cultivar il terren main accessibel e garantir il transport dal pavel e da realisar ina rait da vias che nizzegia a l'agricultura, al forestalesser, al turissem ed era a la populaziun.

85 pertschient dal maun public

En tut custa la meglieraziun funsila da Mustér 30 milliuns francs. 85% surpiglian confederaziun e chantun. Per la vischnanca restan 4'670'000 francs respectiv 100'000 - 150'000 francs ad onn. En vista al fatg ch'il project generescha onn per onn investiziuns da 900'000 - 1,1 milliun francs è la cumpart annuala da la vischnanca supportabla e responsabla. La cumpart dals proprietaris da terren munta a 2'340'000 francs.

Il mars 2012 avevan votantas e votants da Mustér decidì d'instradar la meglieraziun funsila per la vischnanca da Mustér (cun resguardar la situaziun da Segnas e Pardomat).

RR novitads 12:00