Siglir tar il cuntegn
Inhalt

Surselva «Medel mu(e)nta» vul promover il svilup en la val

La dumonda centrala è: Duai la vischnanca da Medel sa sviluppar vinavant ubain duai la val crescher en? La suprastanza è da l’opiniun ch’ella duai sa sviluppar ed ha perquai lantschà il project «Medel mu(e)nta».

Purtret da la Val Medel e davanttiers è da vesair Curaglia.
Legenda: La Val Medel cun davanttiers Curaglia. RTR, Hubert Giger

Ils onns passads èn divers projects vegnids realisads en la vischnanca da Medel. Per exempel il nov hotel Medelina, la Cascharia Muraun, l’Academia Vivian ubain l’uniun La Caura.

Il project «Medel mu(e)nta» veglia promover quests projects e la collavuraziun tranter els, tant il president da vischnanca Peter Binz. L'intent saja dad uschia crear novas purschidas e carmalar dapli giasts en la val. Cun vender products locals e regiunals vulan ins dar in impuls per mantegnair la val muntagnarda sco spazi economic e spazi da viver.

Students vegnan en la val

Ma ins veglia era porscher program da furmaziun ed aventuras. Pertutgant la furmaziun saja la suprastanza en contact cun la scol’auta per scienzas applitgadas a Turitg. Gia per il 2018 vegnan students a far tschertas lavurs durant il studi en la Val Medel. Questa collavuraziun pudess era instradar ulteriurs projects.

Meglierar la signalisaziun

Projects concrets n'ha «Medel mu(e)nta» dentant betg anc en mira. Empermetter po il president communal però ch’ins vegnia a meglierar la signalisaziun cun tavlas avant la chasa communala e cun las tavlas sin la via dal Lucmagn. Ed els fetschian la proposta da far in nov plaz communal.

760'000 francs

Il project cuzza 4 onns e custa totalmain 760’000 francs. La vischnanca paja 165’000 francs. Il rest vegn finanzià da fundaziuns e dal chantun. Il project vegn manà sin il nivel operativ da l’interpraisa Planval SA.

RR actualitad 08:00