Siglir tar il cuntegn
cuntegn

Surselva Medel: Buna situaziun finanziala

La vischnanca da Medel fa regularmain in gudogn en il quint annual. Il quint per il 2017 serra cun in gudogn da 147'967 francs. En il gudogn èn las amortisaziuns da 609’625 francs inclusas. Il cash-flow munta a 795’226 francs.

Platta
Legenda: Platta RTR, H. Giger

Tschains d'aua cun 1.4 milliuns francs

Il quint d’investiziun serra cun expensas da 443’170 francs ed investiziuns nettas da 348’684 francs. Las grondas investiziuns per il 2017 èn stadas ils projects forestals, sanaziuns da vias e la contribuziun per sanar la baselgia da s. Martin da la claustra da Mustér.

Ina buna part da las entradas fan ils tschains d’aua cun 1’461’138 francs. La vischnanca da Medel dispona dad in agen chapital da 2’666’994 francs.

Era gudogn per l'Ovra electrica Medel

Il quint da manaschi 2017 serra cun in surpli da 16'936 francs. Quai cun expensas da 1'675'884 francs ed entradas da 1'692'820 francs. Cun la fin dal 2017 dispona la OEM dad ina facultad da 862'753 francs. Il consum d'energia è s'augmentà 2017 per ca. 200'000 kWh a 4'035'958 kWh.

Pli e pli paucs abitants

Mo malgrà che la vischnanca ha era fatg 2017 intgins progress en l’economia (ex. avertura da l’hotel Medelina ed il project Medel muentà) sa sminuescha il dumber dad abitants pli e pli. Il 2000 aveva Medel anc 502 abitants, la fin dal 2017 anc 384. Perquai che las naschientschas mancan e perquai ch’i dat pli e pli paucs scolars vegn la scola serrada cun la fin da l’onn da scola.

RR novitads 17:00