Il possessur Flavio Pagnamenta da Comano (ina vischnanca sper Lugano) vul arver puspè l’hotel. Mo quel duai servir en l’avegnir sco center da sanadad cun il num: Hotel dalla Posta Eden Zentrum.
Reactivar cun ina spierta da terapias enfin conferenzas
Previs èsi d’offerir differentas terapias sco era ina sauna ed in bogn terc. I dat 10 stanzas e plaz per ca. 30 persunas. Il restaurant en il plaunterren duai porscher spisas sanadaivlas. En la garascha sper l’hotel vul Flavio Pagnamenta endrizzar ina stanza da conferenzas e sesidas.
Platta saja in lieu ruassaivel ed era in vitg cun ina via da transit. Quai sajan ils avantatgs d’in tal center da sanadad.
La finamira saja da collavurar cun clinicas e medis; ed in medi saja preschent a Platta duas giadas l’emna.
Project elavurà cun il politecnicum a Milaun
En ina emprima fasa vegli el investar 100’000 francs, en ina secunda alura in mez milliun. Il project è vegni elavurà cun il politecnicum da Milaun. Sche pussaivel vulan ils novs possessurs dal Hotel dalla Posta a Platta arver il restaurant 2017, e la purschida cun terapias duai esser pronta 2018.
Possessur nov enconuscha la regiun
Pagnamenta è interprendider da finanzas ed ha lavurà 20 onns tar ina banca gronda. Mo problems cun la sanadad han sfurzà el da tschertgar in’autra sfida.
El enconuschia bain la regiun da Medel e conturn, perquai che sia famiglia avevi ina abitaziun en la Val Blegn ed els vegnevian regularmain cun skis da l’autra vart dal pass.