Siglir tar il cuntegn

Header

cuntegn

Surselva Mazlaria gronda Trun è in pass enavant

Sch’i fiss i tenor ils plans dal mazler Ivo Nay che vul bajegiar ina mazlaria gronda a Trun lura fiss quella gia en funcziun. La finanziaziun è dentant segirada pir ussa e quai senza agid dal maun public. Dacurt è la dumonda da bajegiar vegnida inoltrada tar la vischnanca da Trun.

La raschun per il retard è la finanziaziun. Quai ha Ivo Nay ditg sin dumonda dal Radio Rumantsch. La mazlaria vegnia numnadamain finanziada sulettamain d’investiders privats. «Il chantun n'è betg stà pront da sustegnair sper la mazlaria Carnatira a Rueun ina ulteriura mazlaria gronda en la regiun», ha Ivo Nay ditg.

audio
Bunura: Mazlaria gronda Trun è in pass enavant
ord Actualitad dals 24.04.2015.
laschar ir. Durada: 1 minuta 55 Secundas.

Quai ha era Daniel Buschauer da l’Uffizi d’agricultura dal Grischun confermà. Sco el ha ditg, na saja il chantun betg persvas ch’i haja avunda potenzial per ina segunda mazlaria gronda en Surselva. Ina premissa che stoppia esser ademplida per survegnir daners per in tal project ha ditg Daniel Buschauer.

Project redimensiunà

La dumonda da bajegiar ch’è ussa sin maisa tar la vischnanca da Trun prevesa ina mazlaria cun ina surfatscha da 480 meters quadrat. Ella duai vegnir erigida en la zona da mastergn Clius che sa chatta sut la staziun da viafier. Il terren vegn mess a disposiziun da la vischnanca da Trun en dretg da bajegiar. Ivo Nay quinta cun custs totals da 2 milliuns francs. Quai è in milliun damain che previs tar il project preschentà avant prest in onn. Era la grondezza da la mazlaria è vegnida redimensiunada. Uschè spert che la lubientscha da bajegiar è sin maisa, possian las lavurs cumenzar ha Ivo Nay ditg.

Artitgels legids il pli savens