Siglir tar il cuntegn

Header

Navigaziun

Martin Hug è president da las Pendicularas Grischun
Legenda: Martin Hug è president da las Pendicularas Grischun RTR, G. Hosang
cuntegn

Surselva Martin Hug è il nov president da Pendicularas Grischun

Suenter 10 onns surdat Silvio Schmid la batgetta da l’uniun Pendicularas Grischun a Martin Hug. La radunanza generala da l'uniun ha elegì Hug sco nov president.

Martin Hug è stà fin uss vicepresident da l’uniun, e dapi 2006 en suprastanza. El è commember da la direcziun da l’Arena Alva. El daventa successur da Silvio Schmid che ha presidià ils ultims 10 onns l’uniun da las interpresas da pendicularas dal Grischun e che sto sa retrair pervi da la limitaziun dal temp d'uffizi. Ultra da quai è Maurus Tomaschett, maina gestiun da las pendicularas da Val s. Pieder, vegnì elegì en suprastanza da Pendicularas Grischun. 50 interpresas da pendicularas dal Grischun èn commembras da l’uniun Pendicularas Grischun.

Silvio Schmid
Legenda: Silvio Schmid. RTR, G. Hosang

15 onns en suprastanza

15 onns è Silvio Schmid stà en suprastanza da las Pendicularas Grischun, ils ultims 10 onns sco president. Ina pulita purziun onns cunzunt sch’ins considerescha che la branscha da las pendicularas n’ha betg simpel il mument. La reducziun da giasts, ils envierns che vegnan adina pli curts ed il ferm franc dattan da morder.

Sche Silvio Schmid guarda enavos è el cuntent cun quai che l’uniun ha cuntanschì en quai temp. Uschia hajan las pendicularas survegnì ina vusch. Ellas sajan s’exprimidas ed hajan era pudì far attent sin l’impurtanza che las pendicularas hajan.

Anc betg ina vusch en la politica

Main cuntent è Silvio Schmid cun la vusch che las pendicularas han en la politica. Tenor el stuessan ils represchentants da las pendicularas s’engaschar pli ferm en la politica. I saja dentant chapibel che quai n’haja betg funcziunà uschè bain. Ils manaders da las pendicularas patratgian pli economic e guardian plitost che lur manaschis funcziunian, uschia che la politica daventi main impurtanta.

Silvio Schmid di ch'el haja fatg gugent questa incumbensa. Ed a restar vegnian blers inscunters interessants cun blera glieud da la branscha da pendicularas.

Legenda: Guardar il video Territoris da skis cumbattan cun problems da naiv. Durada 02:59 minutas.
Or da Telesguard dals 25.11.2016.

Dapli dis da skis e damain birocrazia

A la radunanza generala èsi er vegnì tematisà la midada da la structura: I dovria dapli dis da skis, dapli enviern e stad e damain birocrazia e custs.

Las entradas da las pendicularas en il Grischun muntan a 207 milliuns francs l’enviern e 15 milliuns la stad. Malgrà la midada dal clima ed il potenzial da la stad dovria anc adina in ferm enviern ed investiziuns en l’infrastructura da las pendicularas, ils indrizs d’ennavar e la gastronomia, communitgeschan las pendicularas.

Curaschi da far reducziuns

Las destinaziuns grondas sajan gia sa posiziunadas bain ils ultims onns, las pitschnas sajan activas en nischas. Problematic vegnia per las pendicularas mesaunas. Quellas vegnan sustegnidas da las regiuns per raschuns economicas, uschia sa retardeschia da midada da structura. Per tuts ils purschiders valia però da sa far valair cun tratgs specifics e d’avair il curaschi dad er far reducziuns.