Siglir tar il cuntegn
Inhalt

Surselva Marcus Weber na chapescha betg pertge che Tujetsch ha retard

Ils plans per la pendiculara nova Sedrun – Cuolm da Vi èn quasi sut tetg. Quai han ils manaders dal project, las pendicularas da Mustér, ditg ad ina conferenza da medias. Ellas spetgan dentant anc la lubientscha da la vischnanca da Tujetsch.

Marcus Weber (sen) e Rudolf Büchi
Legenda: Marcus Weber (sen) e Rudolf Büchi RTR

Marcus Weber, il president dal cussegl d’administraziun da las pendicularas da Mustér, spera che Tujetsch decidia fin il favrer. Sco investider veglian ins realisar spert in project. Il settember passà hajan els gì ina ultima sesida, ed alura saja tut stà cler, ins haja mo anc gì dumondas da detagl. El na chapescha betg ch’i dovra tant temp per suttametter quest project al cussegl da vischnanca ed a la radunanza communala. Il project prevesa in emprest da 2.5 milliuns francs ed ils dretgs da passadi e da passar cun conducts.

Ina cunvegna da tariffas

Il president communal da Tujetsch Beat Roeschlin fa valair che las duas pendicularas da Andermatt-Sedrun e da Mustér stoppian l'emprim collavurar e preschentar ina cunvegna da tariffas. Quai saja stà dapi l’entschatta il punct principal dals discurs. Ins dastgia spetgar ch’ils giasts e la populaziun possian profitar da quest project. El saja fitg trumpà che quai na saja betg schlià, di Roeschlin.

Auter tuna quai tar las pendicularas da Mustér. Il directur Rudolf Büchi di ch’i dettia dapi dus onns ina cunvegna da tariffas.

20 milliuns francs

La pendiculara previsa da Sedrun sin il Cuolm da Vi custa ca. 20 milliuns francs inclusiv il restaurant da panorama. Quel duai porscher da quai da 100 plazs. Igl è era planisà ch’ils giasts pon sortir a Cungieri.

La populaziun da las vischnancas da Tujetsch e Mustér han approvà 2017 la revisiun da la planisaziun locala. Gia l’atun 2016 ha la populaziun da Mustér ditg gea al emprest da 2.5 milliuns francs.

RR actualitad 17:00