Siglir tar il cuntegn
Inhalt

Surselva Mancanza da musicants

La Brass band da giuvenils grischuna ha da cumbatter ils ultims onns cun ina digren da participants.

La bell'aura lubescha era da trenar ordavert el vitg da Meierhof (Sursaissa)
Legenda: La bell'aura lubescha era da trenar ordavert el vitg da Meierhof (Sursaissa) Brass band da giuvenils grischuna

La Brass band da giuvenils grischuna (BBGG) è la plattafurma nua che giuvnas e giuvens fin 25 onns pon sa perfecziunar durant in’emna en in camp e star da cumpagnia cun giuvenils che han ils medems interess. Quest onn sa participeschan be gest 50 giuvnas e giuvens al camp a Sursaissa. Sco quai ch’il president da la BBGG, Toni Deplazes, ha ditg a Radiotelevisiun Svizra Rumantscha, n’è quest dumber n’è betg cuntentaivel.

Pli gugent ir en vacanzas che far part al camp

Raschuns ch’i dat adina damain participants dettia quai differentas, di Toni Deplazes. Per l’ina saja quai la demografia en la Surselva, danunder che la gronda part dals participants vegnivan antruras. Lura suppona Toni Deplazes che las infurmaziuns davart il camp na vegnian betg dadas enavant als giuvens musicants entras las musicas ed ils scolasts da musica. Mo era il patratgar dals giuvenils è sa midà. Sch’ins dumondia giuvenils suenter ch’i èn sa participads dus u trais onns cun grond plaschair, sch’i vegnian era l’onn proxim lura haja savens num ch’i na vegnian betg, pertge ch’els veglian pli gugent ir en vacanzas.

Organisar il camp era en il futur

Per vegnir tar dapli musicants ha la BBGG era envidà giuvenils dal chantun Son Gagl. Quai dentant senza success. Dar si la BBGG na vegn dentant betg en dumonda per la suprastanza actuala. «Uschè ditg che nus da la suprastanza essan motivads na chalain nus betg» di Toni Deplazes. Igl è dentant cler ch’i sto vegnir fatg ponderaziuns tge far per pudair augmentar il dumber da participants. Ideas concretas na dettia quai anc betg.