Ils sulets che pon decider sche la 7132 dastga atterrar cun ses helicopter en la Lumnezia sut per vegnir cun lur giasts da las plazzas aviaticas a Val S. Pieder u betg èn ils possessurs dals funs. Per Arthur Arpagaus a Tersnaus e Balzer Arpagaus a Suadetsch/Peiden èsi cler. Era sch’i dat critica dals vischins na midan els betg opiniun. Els stattan tar lur decisiun da dar il dretg d’atterrar sin lur terren a la 7132 SA. Ernst Jakob da Uors, che metta a disposiziun il plaz il pli dispitaivel, gist sper il vitg dad Uors, n’ha betg vulì prender posiziun envers RTR.
Betg vegnì confruntà dals vischins
Tant Arthur Arpagaus sco era Balzer Arpagaus han ditg, ch’ils vischins n’hajan betg contactà els per empruvar da persvader da betg dar la lubientscha d’atterrar. Anc na sajan era nagins contracts vegnids suttascrits, ha ditg Arthur Arpagaus.
Tschertgar alternativa
La 7132 SA sto tschertgar alternativas, perquai ch’ella na po betg laschar atterrar ils helicopters a Val S. Pieder. Cun 1250 meters sur mar è Val S. Pieder sin ina autezza sur mar ch’i basegna dal BAZL ina lubientscha per endrizzar in lieu d’atterrar en muntogna. Quests èn dentant limitads per l’entira Svizra sin var 40 lieus. Cunquai che quest dumber è gia cuntanschì, èsi grev da survegnir ina tala lubientscha. L’alternativa è da laschar atterrar ils helicopters en Lumnezia sut, nua ch’i na basegna betg ina tala lubientscha.
La vischnanca Lumnezia prenda serius la critica dals convischins. Era ella vul tschertgar alternativas als plazs d’atterrament che la 7132 SA ha gia en mira.