Siglir tar il cuntegn
Inhalt

Surselva Lumnezians sustegnan reducziun da suprastanza

La radunanza communala ha dà l’incumbensa d’elavurar propostas da reducir la suprastanza da nov sin tschintg.

Val Lumenzia
Legenda: Reducziun da dumber da suprastanza na para betg dad esser dispitaivel tar ils lumnezians. RTR, S. Derungs

L’idea da la suprastanza communala da la vischnanca Lumnezia, da reducir il dumber da suprastants da nov sin tschintg, vegn sustegnida da la populaziun lumneziana. Cun 91 cunter naginas vuschs ha la radunanza communala surdà a la suprastanza l’incarica d’elavurar propostas persuenter. «Quai è per nus in cler signal dad ir vinavant questa via e preschentar uschè svelt sco pussaivel ina proposta per laschar votar», commentescha il president communal Duri Blumenthal quest resultat. Sin il pli tard primavaira duai la votaziun esser, per che la regenza haja temp da tractar questa midada.

Betg tema ch’ils vischinadis vegnan a la curta

Il contract da fusiun prevesa che mintga anteriura vischnanca ha da tschentar in suprastant. Cun il president communal dat quai ina suprastanza da nov persunas. Gia tar las emprimas elecziuns avant trais onns n'èsi betg stà pussaivel da far quai. Il vischinadi da Vignogn n'è betg represchentà. Pli tgunsch giaja quai era betg en il futur, anzi il cuntrari, argumentescha la suprastanza actuala. Ch’ils vischinadis hajan forsa dischavantatgs sch’els na pon betg tschentar in suprastant, na crain ils lumnezians betg. Ils dumandads èn da l’opiniun ch’i saja pli impurtant dad avair glieud qualifitgada en suprastanza e quels guardian per l’entira vischnanca e betg sulettamain per in vischinadi.

Ulteriuras decisiuns

Approvà ha la radunanza communala er ils statuts per il cirquit dal register funsil Glion-Lumnezia ed in credit da 450'000 francs per l'installaziun da dumbraders d'aua. Vinavant è vegnì abolì las restricziuns existentas per vender immobiglias a persunas da l'exteriur e fixà la quota persuenter a 100% per l'entira vischnanca. La suprastanza ha era preschentà il quint per il plaz public Palius a Vella. Quel è stà en il rom dal credit concedì da 680’000 francs. Il quint è vegnì approvà.