Siglir tar il cuntegn
cuntegn

Surselva Luf stgarpa danovamain nursas – questa giada a Rueras

Dumengia passada e la notg da mardi sin mesemna haja il luf stgarpà trais nursas e blessà duas a Plaun Miez a Rueras en la vischnanca da Tujetsch. Trais ulteriuras nursas sajan sparidas. Tenor il possessur, Aluis Cavegn da Rueras sajan las nursas stadas serradas en tenor directivas.

Purtret d'in luf.
Legenda: In luf ha stgarpà nursas a Rueras. Keystone

Sco quai ch'il possessur da las nursas, Aluis Cavegn haja detg a l'Agentura da Novitads Rumantscha, hajan ins perfin vis il luf la dumengia vers saira en il conturn dal Plaun Miez. Sin fundament da questa observaziun saja el lura vegnì contactà. La dumengia marvegl sajan las nursas anc stadas quietas.

Sco quai ch'il guardiaselvaschina, Martin Cavegn ha detg sin dumonda da l'ANR saja il luf vegnì fotografà cun agid d'ina trapla da fotografias a Plaun Miez a Rueras e quai mintga notg dapi ch'el haja stgarpà las nursas. Medemamain hajan ins vis il luf ina notg cun agid d'ina apparatura speziala.

Quai n'è er betg stà l'emprim cas da nursas stgarpadas sisum la Surselva questa primavaira. Avant radund trais emnas aveva il luf stgarpà e blessà nursas a Valzeinza sut Mumpé Tujetsch.

RR novitads 15:00