Siglir tar il cuntegn
cuntegn

Surselva Luf ha stgarpà nursas a Mustér

La notg passada ha probabel in luf stgarpà intginas nursas a Mustér.

Luf
Legenda: Lufs stgarpan adina puspè animals manidels en il Grischun. (maletg simbolic) Keystone

Il guardiaselvaschina Werner Degonda ha confermà ch’i saja probabel stà in luf. La cumprova ch’i saja propi stà in luf hajan ins dentant pir suenter ch’ins haja ils resultads da DNA.

Sco Werner Degonda ha ditg vinavant, hajan ins gia dapi in temp adina puspè mussaments ch’in luf saja in pau dapertut enturn en la Surselva. Ils guardiaselvaschina avevan infurmà ils purs ch’in luf saja en la regiun.

Sco quai ch’il president da l’Uniun purila da Mustér, Armin Manetsch ha ditg na saja quai betg gist ina situaziun empernaivla per ils purs. El sez haja er nursas e vegnia a far saivs dublas. Forsa che quai gidia da tegnair davent il luf.