Siglir tar il cuntegn

Header

cuntegn

Lescha da polizia Naginas traplas fotograficas a Trun

Il parlament da la vischnanca da Trun ha approvà la nova lescha da polizia cun 9 Gea cunter 5 Na. Uschia vegnan las traplas fotograficas sin terren communal public scumandadas. Sin intschess privat na pon las cameras betg vegnir scumandadas. Excepziuns po la suprastanza far per l’Uffizi da chatscha e pestga, ma er las instituziuns ston en l'avegnir dumandar la suprastanza per lubientscha.

Er scumandà vegn da lavurar durant las dumengias ed ils firads uffizials. Medemamain vegn reglà il temp da ruaus durant la notg nua che far canera vegn scumandà. Er reglà da nov vegn il diever da fieus bengals ed artifizials. Quels vegnan scumandads durant l’entir onn, cun la menziun en spezial durant il prim d’avust e Silvester.

Emprima deliberaziun cun virivaris

L’emprima deliberaziun da la lescha da polizia aveva stuì vegnir interrutta. Suenter che pliras propostas per midadas eran vegnidas inoltradas a bucca durant las tractandas, era il cussegl communal sa decidì da stuschar la fatschenta suenter la mesadad. Er han tuttas commembras e commembers pudì inoltrar las propostas per midadas ed amplificaziuns a scrit. Uschia n’hai strusch dà discussiun e la lescha ha pudì vegnir tractada a moda effizienta. L’ultim pled en chaussa ha uss anc la populaziun da Trun a l’urna, probabel il settember.  

audio
Per tadlar: curt e cumpact
ord RTR Audio dals 14.06.2022.
laschar ir. Durada: 1 minuta 9 Secundas.

RTR novitads 06:00

Artitgels legids il pli savens