Siglir tar il cuntegn

Surselva Lavurs per la pendiculara sin il Cuolm da Vi han cumenzà

Ils 16 da mars han ils Tuatschins ditg gea a la pendiculara Salins/Sedrun–Cuolm da Vi. E gia l’entschatta d’avrigl han las lavurs da preparaziun cumenzà.

Plattas da betun da tschients tonnas

Las maschinas èn sin ils plazzals, e quai a Salins, nua che la staziun a val vegn realisada sco era sin il Cuolm da Vi, nua che vegn fatga la staziun da muntogna. A Salins han da vegnir chavads dus foss. Là vegnan plattas da betun da plirs tschients tonnas che stendan las sugas da la pendiculara, sco ch'il responsabel per il project e directur da las pendicularas da Mustér Rudolf Büchi declera. Suenter vegni fatg la platta dal fundament ed en il medem temp possian els cumenzar cun las lavurs per montar ils indrizs tecnics da la suga.

Sin il Cuolm da Vi vegn lavurà

Ils lavurers èn dentant era en acziun sin il Cuolm da Vi per bajegiar la staziun da muntogna. Ultra da quai han els gia cumenzà cun il fundament per la pitga 1, e proximamain han els da prender a maun la pitga 4 (sisum) ed alura era cumenzar cun las pitgas 2 e 3.

Quasi sis onns

Rudolf Büchi è levgià, ch’els hajan finalmain pudì cumenzar suenter ina procedura da planisaziun da quasi sis onns. Els veglian prender en funcziun la pendiculara da Salins–Cuolm da Vi fin il proxim enviern.

2019 vegnan realisads il runal ed il restaurant sin il Cuolm da Vi.

RR actualitad 11:00