Siglir tar il cuntegn

Header

cuntegn

Surselva Lavuratori da scriver – Sviluppar ina istorgia or dad ina ditga

Ditgas – ier, oz e damaun. Quai è sta il tema dad in lavuratori da scriver creativ, organisà da l'Uniun per la Litteratura Rumantscha. 8 participantas e participants han prendì part da quel. Ina introducziun en il scriver han els survegnì cun ils referats da Leo Tuor e da Romana Ganzoni.

L’emprim di dal lavuratori han ils participants stuì scriver ina istorgia tenor la ditga: «In cuntè en la chomma». Questa ditga raquinta, co in famegl sto supportar dolurs durant in onn, perquai ch’el ha in cuntè en ina chomma. La finala vegn el liberà. Ord questa ditga han ils participants pudì sviluppar in agen text, saja quai in raquint, ina poesia, in drama etc.

audio
Bunura: Lavuratori da scriver creativ
ord Actualitad dals 22.05.2018.
laschar ir. Durada: 2 minutas 42 Secundas.

Plaschair da far questa experientscha

Ina da las participantas, Marietta Cathomas, ha ditg ch’ella saja sa persa in pau l’emprim mument, fin ch’ella haja chattà la via co ir tras. Il tema da la ditgas na cunvegnia ad ella. Cun da quai da pli baud e cardientschas blauas na possia ella cumenzar bler e perquai na saja ella dal tuttafatg cuntenta cun il resultat. Ma ella haja gì plaschair da far questa experientscha.

Las ideas vegnan en auters muments

Flavia Hobi ha resumà sia experientscha, ch’i saja stà grev da scriver a la sperta, vul dir aifer las duas uras ch'ins haja gì peda da scriver. Savens haja ella las ideas che vegnian, cura ch’ella saja en il tren u sch’ella spetgia insanua. Ella haja sviluppà in'atgna istorgia cun prender in ubain dus pleds ord la ditga. E Flavia di ch’ella scrivia fitg gugent.

Interessant dad udir co ils auters scrivan

Ina persuna che ha gia experientscha da scriver è Walter Rosselli. El è enconuschent sco translatur, surtut era dad ovras rumantschas. Per el saja quai stà facil da crear in auter text cun in pèr pleds or da la ditga. Il pli grev saja dentant stà dad ir davent da la ditga e da scriver insatge auter senza che quai saja ina nova ditga. El haja gugent quests lavuratoris da scriver, perquai ch’ins emprendia adina bler. I saja era interessant dad udir co ils auters scrivian. En ina runda da discussiun han ils participants numnadamain prelegì e discussiunà ils texts.

Promover il scriver litterar

La finamira da quest lavuratori saja stà da promover il scriver litterar, da dar novs impuls ed inputs a quels che scrivan gia e da motivar quels che na scrivan anc betg da cumenzar a far quai. Els veglian cuntinuar mintg’onn cun quests lavuratoris da scriver, per stgaffir ina nova tradiziun da l’Uniun per la Litteratura Rumantscha, uschia la presidenta da l’uniun Viola Pfeiffer.

Sco ella di vinavant, hajan els chattà il tema «Ditgas – ier, oz e damaun», cura ch’els hajan organisà il lavuratori da scriver e sajan stà en la Chasa d’Angel a Lumbrein. Els hajan intervegnì ch’i dettia in nanin en questa chasa, e perquai haja quai dà in connex cun las ditgas. E la segunda part dal tema «ier, oz e damaun», haja da far cun in'exposiziun da fotografias che vegn preschentada dals 17 da zercladur 2018 fin ils 15 da mars 2019 en questa chasa.

RR actualitad 07:00

Artitgels legids il pli savens