Siglir tar il cuntegn

Header

video
In hotel a Flem lascha lavurar ses persunal quatter dis ad emna
Or da Telesguard dals 03.05.2022.
laschar ir. Durada: 3 minutas 55 Secundas.
cuntegn

Lavurar pli flexibel L'hotel Adula a Flem introducescha «Flex Work»

Persunas che lavuran en l'hotellaria e gastronomia daventan adina pli raras. Perquai ha l'hotel Adula a Flem decis da porscher cundiziuns da lavur pli attractivas per lavurers e lavureras. Uschia han els introducì il model da lavur «Flex Work». Oz lavura il persunal en l'hotel Adula per regla tschintg dis l'emna. Cun il model nov dastgan ils collavuraturs e las collavuraturas era lavurar be anc quatter dis, per la medema paja. Las uras minus ch'els fan en quatter dis van sin in conto da reserva e vegnan fatgas durant la stagiun auta cura che tuts lavuran puspè tschintg enfin sis dis l'emna. L'avantatg princial dal model è ch'il persunal po tscherner in di liber fix.

audio
Models da lavur per il futur: exempel Adula
ord Actualitad dals 03.05.2022.
laschar ir. Durada: 2 minutas 44 Secundas.
Cura ch'igl ha gì num ch’ins haja la pussaivladad da far trais dis liber n’hai jau stuì studegiar gnanc ina secunda – per mai era cler ch’jau fatsch quai.
Autur: Gieri Albin manader da la recepziun da l'hotel Adula

Cun la midada dal model da lavur vegnan dentant era novas sfidas. L'hotel Adula sto emploiar var diesch novas persunas che lavuran parzialmain. Quai auza natiralmain era las expensas – tge che vul dir che tut daventa pli char. Perquai ha l'hotel Adula auzà ses pretschs per circa 10%. Il manader da l'hotel Adula a Flem, Paul Urchs, è dentant persvas che quai na vegn betg ad esser in problem per ils giasts.

Jau sun segir ch'ils giasts èn pronts da pajar in pau dapli per ch'i dettia vinavant ils servetschs sco enfin ussa.
Autur: Paul Urchs manader da l'hotel Adula

La HotellerieSuisse grischuna sustegna il model da «Flex Work», di il president Ernst Wyrsch. Tals models sajan bain pli cumplexs e custian dapli, dentant senza questa midada na chattassan ins betg pli lavurers e lavureras. Perquai di el, ch'el pensia ch'il model da «Flex Work» saja effectiv e vegnia ad esser in model da lavur dal futur.

Sindicat beneventa nov model

Il pli grond sindicat da la Svizra beneventa las stentas da novs models da lavur. Sco quai che la Unia scriva sin dumonda da RTR, saja impurtant ch’ina flexibilisaziun dal temp da lavur na giaja betg sin donn e cust dal persunal. I dettia in tschert privel, ch’ils dis da lavur daventian fitg lungs. Il temp da paus dad 11 uras tranter dus dis da lavur, stoppia vinavant vegnir resguardà sco quai ch’i saja prescrit, uschia la Unia. Da l’autra vart possia in’emna da lavur da quatter dis era gidar da meglierar la cumpatibilitad da lavur e famiglia. Bun saja che las collavuraturas ed ils collavuraturs possian a Flem en l'hotel Adula tscherner sez il model da lavur giavischà.

audio
Models da lavur per il futur: posiziun Unia
ord Actualitad dals 03.05.2022.
laschar ir. Durada: 2 minutas 43 Secundas.

RTR actualitad 07:00

Artitgels legids il pli savens